नेकपा एमालेका अध्यक्ष केपी शर्मा ओलीले पहिचानको नाममा भइरहेको आन्दोलनमा प्रधानमन्त्रीले दोहोरो भूमिका खेलेको आरोप लगाएका छन् ।

पार्टीका नवनियुक्त केन्द्रीय सदस्यहरूको शपथ ग्रहण कार्यक्रममा उनले प्रदेश १ (कोशी प्रदेश)मा पहिचानको नाममा भइरहेको हिंसात्मक आन्दोलनमा प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’को प्रत्यक्ष संलग्नता रहेको आरोप लगाए ।

बिहीवार पार्टी केन्द्रीय कार्यालयमा सम्बोधन गर्दै ओलीले एमाले केन्द्रीय सदस्य एवं प्रदेशसभा सदस्य राम रानालाई मोबिल खन्याएर जलाउने प्रयास हुँदा पनि सरकार मुकदर्शक बनेको आरोप लगाए । ‘हरेक जिल्लामा तिनै केटाहरू मोटरसाइकल लिएर हिड्ने गरेका छन्, २०७३ सालतिर मधेशमा त्यही भएको थियो । प्रदेश १ मा पहिचानका नाममा आपराधिक घटना भएको छ । किरात प्रदेश राख्न किन खोजेको रहेछ, राख्दा के हुँदो हो ?’ ओलीले प्रश्न गरे । 

प्रचण्डले पहिचानको राजनीतिको नाममा विषको आगो लगाउन खोजेको ओलीले आरोप लगाए । चिनियाँ नाटकको उदाहराण दिँदै ओलीले प्रचण्ड बहुरूपी भएको आरोप लगाए । ‘प्रचण्ड भनेको त्यस्तै हो, यसो गर्दा प्रो चाइनिज, यसो गर्दा प्रो इण्डियन । यसो गर्दा हिंसावादी अनि शान्तिवादी । कहिले १०८ किलो रुदाक्षवाला यसो गर्दा पहिचानवादी यसो गर्दा राष्ट्रिय एकतावादी !’ शारीरिक हाउभाउ प्रदर्शन गर्दै ओलीले प्रचण्डप्रति टिप्पणी गरे ।

मोबिल छर्केर आगो लगाउने हर्कतलाई राजनीति मान्न नसकिने भन्दै उनले अब एमाले चुप लागेर बस्न नसक्ने चेतावनी दिए । ‘गुण्डागर्दीको राजनीतिलाई जवाफ दिनुपर्ने बेला भएको छ । राम रानालाई आगो लगाउने प्रयास भयो । सरकारले सुरक्षा दिएन भने दृढतापूर्वक मुकाबिला गर्ने काममा लाग्छौं’ ओलीले भने ।