१७ असार २०८३, बुधबार
दक्षिण भारतीय अभिनेता प्रभास स्टारर फिल्म ‘आदिपुरुष’ काठमाडौं उपत्यकाभित्रका हलमा पनि प्रदर्शनमा आएको छ ।
नेपालको ठूलो मल्टिप्लेक्स चेन क्यूएफएक्सले ११ बजेदेखि काठमाडौं उपत्यकामा फिल्म प्रदर्शनमा ल्याएको हो ।
बिहीबार ‘जानकी भारतीय छोरी हुन्’ भन्ने संवादलाई लिएर विवाद भएसँगै शुक्रवारको बिहानी शो रद्द गरिएको थियो । क्यूएफएक्सकी बजार प्रबन्धक तृप्ती गिरीका अनुसार दर्शकको सुरक्षालाई मध्येनजर गर्दै बिहानी शो संचालन नभएपनि ११ बजेपछिका शोहरु संचालन भइरहेका छन् ।
फिल्ममा विवादित संवादमा आपत्ति जनाउँदै बिहीवार सेन्सर बोर्डले प्रदर्शन अनुमति दिन अस्वीकार गरेको थियो ।
फिल्मबाट विवादित संवाद हटाएर आएपछि मात्र बोर्डले अनुमति दिएको थियो ।
काठमाडौं महानगरपालिकाका मेयर बालेन शाहले उक्त संवाद भारतबाट पनि नहटेसम्म काठमाडौंमा हिन्दी फिल्म प्रदर्शनमा रोक लगाउने चेतावती दिएसँगै सामाजिक सञ्जालमा तरंग पैदा भएको थियो ।
फिल्म प्रदर्शनबारे निर्णय लिन शुक्रबार बिहान नेपाल चलचित्र संघको बैठक बसेको थियो । उक्त बैठकले संयमित भएर फिल्म प्रदर्शन गर्ने निर्णय गरेको छ ।
काठमाडौंसहित देशभरका हलमा पनि फिल्म प्रदर्शनमा आएको छ ।
