काठमाडौं, २५ भदौ — गत मंगलवार हत्या गरिएकी भारतीय पत्रकार गौरी लंकेशलाई क्रिस्चियन साबित गर्नका लागि झुटो समाचार र तस्वीर फैलाइएको छ ।

केही अतिवादी दक्षिणपन्थी समूहहरूले उनको पूरा नाम गौरी लंकेश प्याट्रिक भएको र उनी वास्तवमा क्रिस्चियन भएको भनी झुटो सन्देश सामाजिक सञ्जालमा फैलाइरहेका छन् ।

गौरीले सम्पादन गर्ने साप्ताहिक पत्रिका गौरी लंकेश पत्रिकेको एक प्रतिसँगै एउटा कलम राखेर उनको मृत शरीरलाई चिहानमा गाडिएको थियो । बुधवार बंगलोरको चम्राजपेतस्थित लिंगायत रुद्रभूमिमा उनको अन्तिम संस्कार गरिएको थियो ।

खासमा अतिवादीहरूले गौरी लंकेश पत्रिकेको पत्रिके भागलाई तोडमरोड गरेर प्याट्रिक नाम दिएका हुन् । गौरीको पत्रिका दलितमुखी तथा जातिवादविरोधी थियो ।

उनी लिंगायत भएकाले उनलाई चिहानमा गाडिएको कुरालाई तोडमरोड गरेर क्रिस्चियन बनाइएको देखिन्छ ।

लिंगायत सम्प्रदाय ईसाको १२औं शताब्दीमा गुरु वासवेश्वरले स्थापना गरेका थिए र उनी वर्णाश्रम व्यवस्थामा विश्वास गर्दैनथिए र सबैलाई एउटै हैसियत दिन्थे ।

यसकारणले गर्दा विभिन्न जातका मानिसहरूको उनको अनुयायी बन्न पुगे । लिंगायतहरू आफूलाई छुट्टै धर्म मान्छन् ।

त्यसैले गौरीको जिन्दगीमा कुनै प्याट्रिक थिएन र सबै हिन्दूहरूलाई जलाइन्छ नै भन्ने छैन ।

द टाइम्स अफ इन्डियाबाट