०२ साउन २०८३, शनिबार
अभिनेत्री शिल्पा मास्केले ‘परस्त्री’ फिल्मले आफ्नो करियर नै परिवर्तन गर्ने अपेक्षा व्यक्त गरेकी छिन् । दिल्लीमा आयोजित पत्रकार सम्मेलनमा बोल्दै उनले अवसर पाएको खण्डमा आफू बलिउड फिल्ममा समेत काम गर्न तयार रहेको बताइन् ।
सुरज पाण्डेको निर्देशनमा तयार फिल्म ‘परस्त्री’ आगामी शुक्रवारबाट नेपाल र भारतमा एकसाथ प्रदर्शनमा आउँदैछ ।
फिल्मको हिन्दी भर्सन भारतमा मात्रै र नेपाली भर्सन नेपालमा प्रदर्शन हुने निर्माण टिमले जानकारी दिएको छ ।
यो फिल्म शिल्पाले दिएको बोल्ड सिनका कारण पनि यतिबेला चर्चामा छ ।
निर्माण टिम नेपालको प्रचारप्रसार सकेर केही दिन भारतका विभिन्न सहरमा पुगेर फिल्मको प्रचारप्रसार गरेको थियो । सोही क्रममा दिल्लीमा आयोजना गरिएको पत्रकार सम्मेलनमा बोल्दै शिल्पाले फिल्मलाई लिएर आफूमा ठूलो अपेक्षा रहेको बताएकी हुन् ।
निर्देशक पाण्डेले फिल्म हेर्न नेपालमा मात्रै नभइ भारतमा पनि दर्शक उत्साहित रहेको प्रतिक्रिया मिलेको बताए । उनले ‘परस्त्री’को कथा युनिभर्सल भएको दाबी समेत गरेका छन् ।
यस्तो कथामा अहिलेसम्म नेपालमा फिल्म नै निर्माण नभएको भन्दै फिल्मको प्रिजेन्टेसन भने नेपाली दर्शकको स्वाद अनुसार निर्माण गरेकाले केही फरक लाग्न सक्ने निर्देशक पाण्डेले बताए ।
अभिनेता गौरव विष्टले ‘परस्त्री’ जस्तो फिल्ममा काम गर्न पाउनु आफ्नो लागि ठूलो अवसर भएको बताए । उनले भारतीय दर्शकलाई नेपाली फिल्मलाई पनि बलिउड फिल्म जत्तिकै माया गरिदिन आग्रह गरे । यस्तै निर्माता शर्मिला पाण्डेले ‘परस्त्री’लाई भारतीय दर्शकले मन पराएको खण्डमा अर्को फिल्म पनि हिन्दी भर्सनमा निर्माण गर्ने बताइन् ।
दीपेन्द्र के. खनालको लेखन रहेको फिल्म विवाहेत्तर सम्बन्धले निम्त्याउने पारिवारिक र सामाजिक संकटको कथावस्तुमा निर्माण भएको हो ।
फिल्ममा कोसिस क्षेत्री, शिल्पा मास्के, गौरव विष्ट, अलिसा क्षेत्री, अशान्त शर्मा, रामबाबु रेग्मी, सरस्वती अधिकारी, झकेन बिसी, अर्पित न्यौपाने लगायतको अभिनय छ ।
