१० असार २०८३, बुधबार
अर्थमन्त्री डा. प्रकाशशरण महतले आगामी आर्थिक वर्ष २०८०/०८१ को बजेटको श्रोत कम रहेकाले सबै पक्षलाई समेट्न नसकेको स्वीकार गरेका छन् ।
नेपाली कांग्रेसका प्रवक्तासमेत रहेका महतले शुक्रवार पार्टी केन्द्रीय कार्यालय सानेपामा आयोजित प्रशिक्षण कार्यक्रमलाई सम्बोधन गर्दै कसौँडीमा पाक्नसक्ने चामलले जन्तीलाई खुवाउनु पर्दा केही असन्तुष्टि व्यक्त भएको टिप्पणी गरे ।
अन्योलताबीच पनि आफूले जायज कुरा सम्बोधन गरेर बजेट विनियोजन गरेको उनको भनाइ छ ।
कसैलाई फाइदा र बेफाइदा पुग्नेगरी बजेट विनियोजन नगरेकोउनले बताए । ‘अनेकौँ अन्योलताबीच दुई महिनामा मैले बजेट ल्याउनुपर्ने स्थिति थियो । मैले दृढ निश्चय गरेर बजेट ल्याएँ । कसैलाई फाइदा र कसैलाई बेफाइदा पुग्ने गरी होइन, आम नागरिकलाई भलो हुने र अर्थतन्त्र चलायमान हुनेगरी ल्याएँ । एउटा कसौँडीमा पाक्नसक्ने चामल जन्तीलाई खुवाउनु परेको खण्डमा के हुन्छ ? हाम्रो आम्दानी कसौँडीमा पकाउने चामल छ, सबैको चाहना पूरा गर्न ठूलो खड्करोमा पकाउँदा पनि पुग्दैन । सबैको भावनाको सम्बोधन गर्न सकिँदैन ।’
मन्त्री महतले नयाँ पार्टीले आकाशको तारा झार्छु भन्दा पनि नागरिकहरू मान्न तयार रहने स्थिति देखिएको बताए ।
