प्रमुख प्रतिपक्षी दल नेकपा एमालेले ‘आफूलाई प्रधानमन्त्री बनाउन प्रितम सिंह दिल्ली धाएको’ भन्ने प्रधानमन्त्री पुष्पकमल दाहाल ‘प्रचण्ड’को अभिव्यक्तिलाई लिएर संसदमा स्पष्टीकरण माग गर्ने निर्णय गरेको छ । 

प्रधानमन्त्रीबाट चित्त बुझ्दो जवाफ नआए बैठक अवरुद्ध गर्ने एमालेले बताएको छ । संसद् भवन नयाँ बानेश्वरमा बुधवार बसेको एमाले संसदीय दलको आकस्मिक बैठकले प्रधानमन्त्रीको पछिल्लो अभिव्यक्ति देशको स्वाभिमानविरोधी भन्दै संसदमा जवाफ माग्ने निर्णय गरेको हो ।

‘प्रधानमन्त्रीको अभिव्यक्ति देशको स्वाभिमान, सार्वभौमसत्ता र संसद्को गरिमाविपरीत छ । संसद्ले बनाएको होइन, दिल्लीले बनाएको भन्नेजस्तो गरी उहाँले बोल्नुभएको छ,’ बैठकपछि एमाले सचेतक महेश बर्तौलाले भने, ‘यो विषयलाई एमालेले गम्भीरताका साथ लिएको छ । प्रधानमन्त्रीले संसदमाथि गरेको अपमान र स्वाभिमानमाथिको आक्रमणबारे संसदमा जोडदार रूपमा लैजाने निर्णय गरेका छौं ।’ 

एमाले सचेतक बर्तौलाले प्रधानमन्त्रीले पदमा बस्ने नैतिक हैसियत गुमाइसकेको टिप्पणी गरे ।

‘यो प्रधानमन्त्रीको निजी विषय होइन, असामान्य विषयलाई संसदमा त्यही ढंगले उठाउने छौं । सामान्य विषय नभएको कारणले बैठक अवरुद्ध हुन सक्छ । नैतिक हिसाबले प्रधानमन्त्रीको हैसियतमा बस्ने नैतिकता गुमाउनुभएको छ,’ उनले भने । 

प्रतिनिधि सभाको बैठक बुधवार दिउँसो ३ बजेका लागि बोलाइएको छ । बैठकअघि एमाले संसदीय दलको बैठक बसेको हो ।