२६ जेठ २०८३, मंगलबार
सामुदायिक विद्यालय व्यवस्थापन समिति महासङ्घ नेपालले अभिभावकमार्फत व्यवस्थापन समिति अध्यक्ष चयन हुने व्यवस्था गर्न माग गरेको छ ।
महासङ्घले आज काठमाडौँ महानगरपालिकालाई ज्ञापनपत्र बुझाउँदै वडा अध्यक्ष नै स्वतः व्यवस्थापन समिति अध्यक्ष हुने प्रावधान खारेज गर्न पनि माग गरेको हो । महासङ्घका अध्यक्ष गुणराज मुक्तानले महानगरपालिकाका उपप्रमुख सुनिता डङ्गोललाई ज्ञापनपत्र बुझाए ।
काठमाडौँ महानगरको विद्यालय व्यवस्थापन समिति विघटन गर्ने निर्णयको विरोध जनाउँदै महासङ्घले ज्ञापनपत्र बुझाएको उनले उल्लेख गरे । उक्त ज्ञापनपत्र बुझ्दै उपप्रमुख डङ्गोलले महासङ्घले उठाएको विषयमा छलफल गर्ने वचन दिएको अध्यक्ष मुक्तानले बताए ।
काठमाडौँ महानगरपालिकामा रहेका सामुदायिक विद्यालयहरूको वर्तमान व्यवस्थापन समिति विघटन गरी वडा अध्यक्षहरूको नेतृत्वमा विद्यालय व्यवस्थापन समिति गठन गर्ने हालै काठमाडौँ महानगरले निर्णय गरेको थियो ।
