बुटवलमा शुक्रवारदेखि दुई दिने धर्म, ज्योतिष एवं वास्तु सम्मेलन शुरु भएको छ । 

कार्यक्रमको उद्घाटन गर्दै मुक्तिनाथ धामका संरक्षक १००८ लोकानन्द स्वामी महाराजले ज्ञानको सागरमा दर्शन र स्नान हुने अवसरका रुपमा कार्यक्रम महत्वपूर्ण भएको बताए । धर्म सभा आफैंमा पूर्ण हुने भन्दै उनले ज्योतिषलाई चिन्न र मनन गर्न व्यवहारमा लागु गर्न सुझाव दिए ।

विश्व ज्योतिष महासंघ लुम्बिनी प्रदेश समितिको आयोजना तथा लुम्बिनी पूजा सामग्री भण्डार बुटवलको सह–आयोजनामा भएको सम्मेलनमा प्राडा देवमणि भट्टराईले आशौच परिचय र निर्णयहरू विषयमा कार्यपत्र प्रस्तुत गर्नेछन् । यस्तै उप प्रध्यापक लक्ष्मीप्रसाद बरालले ज्योतिषशास्त्रमा वैदेशिक यात्रासम्बन्धी कार्यपत्र प्रस्तुत गर्ने कार्यक्रम रहेको महासंघ लुम्बिनी प्रदेशका अध्यक्ष जनार्दन न्यौपानेले जानकारी दिए ।

उनका अनुसार प्रशिक्षण वास्तु र जीवन प्रशिक्षण बारे डा. माधवमंगल जोसी कार्यपत्र प्रस्तुत गर्नेछन् ।

नेपाल र भारतका गरी पाँच सयभन्दा बढी ज्योतिषीहरूको सहभागिता रहने सम्मेलनले बुटवल घोषणापत्र समेत जारी गर्नेछ । सम्मेलनमा स्वामी लोकानन्द जी महाराज, डा. माधवमंगल जोशी, नेपाल पञ्चांग निर्णायक विकास समितिका अध्यक्ष प्रा. श्रीकृष्ण अधिकारी, संस्कृत केन्द्रीय विभागका प्राडा. नारायण गौतमलगायतको सहभागिता रहेको छ ।

कार्यक्रममा धर्म, अध्यात्म, कर्मकाण्ड, ज्योतिष विद्या, योग, तन्त्र, साधना, वास्तु विज्ञ, निर्माण व्यवसायी, व्यापारी, एवं वास्तु विषयसँग रूचि राख्ने र तत्वसम्बन्धी काम गर्दै आएका व्यक्तिहरू सहभागी रहेको कार्यक्रम संयोजक सुन्दर भण्डारीले बताए ।