२५ जेठ २०८३, सोमबार
काठमाडौं, १ असोज — संसारमा हरेक मानिसले पैसा कमाउनका लागि कुनै काम गर्नैपर्छ । सामान्य जागिर त तपाईंले थाहा पाउनु नै भएको छ तर विदेशमा यस्ता काम पनि डिमान्डमा छन् जसका बारेमा मानिसलाई खासै जानकारी छैन । तर यस्ता अनौठा जागिरमा मानिसले राम्रो तलब पाउँछन् ।
नांगा मोडेल
कम समयमा थुप्रो पैसा कमाउन मन छ भने नांगिनुस् । न्युड मोडेललाई घन्टाको हिसाबमा तलब दिइन्छ । एक घन्टाको २० हजार रुपैयाँसम्म पाइन्छ । कलाको क्षेत्रमा नग्न मोडेलको माग उच्च छ । पेन्टरहरूले आफ्नो कामलाई बढी यथार्थपरक बनाउन नग्न मोडेल लिन्छन् ।
नरिवल जाँच्ने
भियतनाममा नरिवल झर्न ठिक्क परेको छ कि छैन भनी जाँच्ने मानिसले राम्रो तलब थाप्छन् । नरिवल खसेर टाउकोमा बज्रिएर धेरै मानिस मर्ने भएकाले यस्ता जाँचकीले नरिवल झर्न लागेका छन् छैनन् हेर्नुपर्छ । झर्न लागेको नरिवल यिनीहरूले टिप्छन् ।
जनावरको खाना चाख्ने
जनावरलाई खुवाइने खाना चाख्ने मानिसको तलब सुन्दा तपाईं पनि यो जागिर गर्न चाहनुहुन्छ होला । यसका लागि लगभग चार लाख ३० हजार रुपैयाँ पाउनुहुन्छ । यो त सिकारुको तलब भयो । अनुभवीहरूले त यसका लागि ८० लाख रुपैयाँसम्म पाउँछन् । घरपालुवा जनावरका लागि खाना चाखिदिने काम हो यो ।
फिल्म हेरेर पैसा कमाउने
अमेरिकामा मुभी फलोअर्स नामक जागिर छ । यसमा मानिसले फिल्म हेरेर त्यससँग जोडिएका प्रमुख शब्द वा कीवर्ड्स निकाल्नुपर्छ । यसरी कीवर्ड्स निकाल्दा मानिसलाई फिल्म सर्च गर्न सजिलो हुन्छ । यसका लागि राम्रो पैसा दिइन्छ ।
रेलमा मान्छे कोच्ने
जापानका भूमिगत रेलमा खुट्टा राख्ने ठाउँ हुँदैन । त्यसैले सरकारले यात्रुहरूलाई रेलभित्र ठेलेर कोच्ने मानिसहरू नियुक्त गरेको छ । सबैलाई समयमै पुग्नुपर्ने भएकाले रेलमा भीडभाड हुन्छ ।
सुतेर तलब थाप्ने
यो जागिरमा तपाईंले गद्दामा सुतेर कत्तिको मजाले निद्रा लाग्यो भन्नुपर्ने हुन्छ । ओछ्यानको गुणस्तर पत्ता लगाउनका लागि कम्पनीहरूले मोटो रकम खर्चेर मानिसहरूलाई सुत्न लगाउने गरेका छन् ।
अँगालो हाल्ने
दुःखी मानिसहरूलाई अँगालो हालेर दुःख हटाउने प्रयत्न गर्ने जागिर पनि छ । विकसित देशका मानिस एक्लोपनका कारण प्रायः दुःखी रहन्छन् । उनीहरूलाई प्रेमको आवश्यकता हुन्छ । विज्ञहरू त्यस्ता मानिसलाई अँगालो हाल्छन् र पीडा कम गर्न सहायता गर्छन् । यसका लागि उनीहरूलाई एउटा सत्रमा लगभग १३ हजार रुपैयाँ दिइन्छ ।
एजेन्सी
