काठमाडौँको  गैह्रीगाउँस्थित दिव्य सः मिलभित्र (काठ मिल) चार जनाको हत्या भएको छ । हत्या गरिएका चारमध्ये तीन जना एकै परिवारका हुन् । दोलखा घर भएका ५५ वर्षीय कुमार भुजेलको परिवारका तीन जनाको हत्या भएको हो । एक जना भने मोरङका हुन् । 

काठमाडौं उपत्यका प्रहरी कार्यालय एसएसपी दिनेश मैनालीका अनुसार हत्या गरिएका भुजेल सोही काठ मिलमा सुरक्षा गार्डकारूपमा कार्यरत थिए । मिलभित्रै उनकी श्रीमती करिब ५० वर्षकी अम्बिका भुजेल र आमा सुमित्रा भुजेलको पनि हत्या भएको छ ।

हत्या गरिएका अर्का एक जना मोरङका १९ वर्षका नवीन राई हुन् । उनीहरू चारै जनाको शव पोस्टमार्टमका लागि टिचिङ अस्पताल महाराजगन्ज लगिएको उनको भनाइ छ । 

घटनास्थलबाट सोधपुछको लागि काठमाडौं-३२ तीनकुने बस्ने दिपेन्द्र राईलाई नियन्त्रणमा लिइएको हो । 

 गैह्रीगाउँस्थित दिव्य सः मिलभित्र धारिलो हतियार ‘खुकुरी’ प्रहार गरेर हत्या गरेको अवस्थामा गएराति चार जनाको शव भेटिएको थियो । 

राति १२ बजेतिर घटना भएको प्रारम्भिक जानकारी आएको उनले बताए । घटनाको कारण खुलिसकेको छैन । यसबारे थप अनुसन्धान भइरहेको प्रहरीको भनाइ छ ।