२४ जेठ २०८३, आइतबार
नेपाली कांग्रेसका केन्द्रीय सदस्यहरूले शिक्षकका समस्या छिटो समाधान गर्नका लागि प्रभावकारी अग्रसरता लिन पार्टी नेत्तृत्वसमक्ष आग्रह गरेका छन् । बिहीवार केन्द्रीय समितिको बैठकमा बोल्दै केन्द्रीय सदस्यहरू कल्याण गुरुङ, नैनसिंह महर र प्रतिमा गौतमले ठूलो दलको रुपमा कांग्रेसले शिक्षकको समस्या समाधानमा अग्रसरता लिनुपर्ने बताएका हुन् ।
‘शिक्षकहरू पढाउन छोडेर आन्दोलन गर्न राजधानीकेन्द्रित भइरहेका छन् । जतिसक्दो छिटो वार्ता गरेर समाधान गर्नुपर्छ,’ उनले भने । साथै गुरुङले केन्द्रीय समितिको बैठकमा विषयकेन्द्रित गरेर छलफल हुने वातवरण बनाउनुपर्ने बताए ।
केन्द्रीय सदस्ीय प्रतिमा गौतमले शिक्षकको कारण राजधानीमा दुई जाम हुने अवस्था आएको भन्दै कांग्रेस आफैंले अग्रसरता लिएर निकास निकाल्नुपर्ने बताइन् ।
‘शिक्षकका कारण दुई घण्टा काठमाडौंमा जाम भयो । शिक्षा विधेयकलाई कसरी अगाडि बढाउने र समस्या समाधान कसरी गर्ने भन्नेमा अब छिट्टै टुंगोमा पुग्नुपर्छ,’ उनले भनिन् ।
सरकारले नागरिक अपेक्षा पूरा गर्न नसकेको भन्दै उनले अब यसका लागि कांग्रेस अग्रसर हुनुपर्ने बताइन् ।
‘सरकारले डेलिभरी दिन सकेन, नागरिकका निराशालाई चिरेर अगाडि बढ्ने हामीले सोचेनौं भने चुनौती झन् थपिन्छन्,’ गौतमले भनिन्, ‘यसैले जनताको अपेक्षा कांग्रेससँग छ हामीले अपेक्षा पूरा गर्छौ भनेर आवश्वासन दिएका छौं । यसैले नागरिकसँग जोडिएका अपेक्षा पूरा गर्न हामी नै अग्रसर हुनुपर्छ ।’
कांग्रेस सरकारमा हुँदा पार्टीका नेता कुटिनेसम्मको स्थिति आउनु दुःखद भएको उनले बताइन् ।
‘हामी सरकरमा छौं, तर हाम्रै सहमहामन्त्री र माननीय कुटिएका छन् । हामीले केही न केही गर्नैपर्छ,’ उनले भनिन्, ‘पार्टीका संरचना र भ्रातृ संस्थालाई पनि पूर्णता दिन ढिलाइ गर्नुहुन्न ।’
केन्द्रीय सदस्य नैनसिंह महरले वार्ता र संवाद गरी शिक्षकका समस्या समाधानमा सबैजना केन्द्रित हुनुपर्ने बताए ।
