२५ जेठ २०८३, सोमबार
अख्तियार दुरुपयोग अनुसन्धान आयोगले नक्कली शैक्षिक प्रमाणपत्र बनाएको आरोपमा एक राहत शिक्षकविरुद्ध भ्रष्टाचार मुद्दा दायर गरेको छ ।
कैलालीको घोडाघोडी नगरपालिका वडा नम्बर २ साडेपानीस्थित दशरथ माध्यमिक विद्यालयमा राहत शिक्षकमा कार्यरत महेश शाहविरुद्ध शुक्रवार विशेष अदालत काठमाडौंमा मुद्दा दायर गरिएको आयोगका प्रवक्ता भोला दाहालले जानकारी दिए ।
प्रवक्ता दाहालका अनुसार शाहले इण्टरमिडियटको सर्टिफिकेट नक्कली बनाएर पेस गरी अध्यापन गरिरहेको उजुरी आयोगमा परेको थियो ।
अनुसन्धानका क्रममा शाहले माध्यमिक शिक्षा परिषद्, उत्तर प्रदेश, बोर्ड अफ हाइस्कूल ऐण्ड इण्टरमिडिएट एजुकेशन, यूपी, राजकीय हुसेनावाद इण्टर कलेज भारतबाट प्राप्त गरेको भनिएको प्रमाण पत्र नक्कली भएको पुष्टि भएको थियो ।
भ्रष्टाचार निवारण ऐन, २०५९ को दफा १६ को उपदफा (१) बमोजिम सजायको मागदाबीसहित मुद्दा दायर गरिएको आयोगले जनाएको छ ।
