०३ साउन २०८३, आइतबार
साङ्गीतिक क्षेत्रमा लोभलाग्दो ख्याति कमाएका प्रकाश सपूतले ‘परदेशी २’मार्फत चलचित्र उद्योगमा पाइला राखे । दशैँको अवसर पारेर प्रदर्शनमा आएको चलचित्रले सुखद् व्यापार गर्न सफल रह्यो । उनै प्रकाशले चलचित्र निर्माणमा समेत पाइला चाल्ने तयारी छ । यद्यपि, उनले केही कारणहरूले चलचित्रमा लगानी गर्न हिम्मत नआएको बताएका छन् ।
प्रदर्शनरत चलचित्र ‘दिमाग खराब’ले पर्दाभित्र र पर्दा बाहिर उठाएको मुद्दाको प्रशंसा गर्दै प्रकाशले बुधवारफेसबुकमा लेखेका छन्, ‘ आन्तरिक नेपाली चलचित्रबीचको खिचातानी होस् वा विदेशी चलचित्र लिएर गरिने हस्तक्षेप । कम्तीमा चलचित्र प्रदर्शनलाई व्यावसायिक रुपमा मर्यादित, पारदर्शी र न्यायपूर्ण बनाइदिए हुन्थ्यो ।’
उनले अगाडि लेखेका छन् ‘ किनकी चलचित्रमा भन्न सकिन्छ कि भनेर साँचेका केही आफ्ना मौलिक कथाहरू छन । यस्तै केही कारणहरूले लगानी गर्न हिम्मत आएको छैन ।’ उनले चलचित्रमा अभिनेत्री स्वस्तिमा खड्काले गरेको अभिनयको प्रशंसा गरेका छन् ।
‘दिमाग खराब’ले दर्शक बढिरहँदा पनि शोज कटौती भएपछि शोज र सेयर बाँडफाँडमा आपत्ति जनाउँदै प्रदर्शन रोक्ने चेतावनी दिएको थियो । त्यसपछि चलचित्रले हिन्दी चलचित्रसरह शोज पाएको थियो । सेयर बाँडफाँडको विषयमा भने टुंगो लागेको छैन । प्रदर्शनभर ५० प्रतिशत सेयर पाउनुपर्ने माग चलचित्र टिमको छ । सेयर बाँडफाँड लगायतका मुद्दाको विषयमा टुंगो लगाउन चलचित्र संघ र चलचित्र निर्माता संघले वार्ता टोली नै गठन गरेर छलफल गरेको छ ।
