इंग्लिस प्रिमियर लिग फूटबलको साविक विजेता म्यानचेस्टर सिटीले अग्रता जोगाउन नसक्ला तुलनात्मक सानो टोली क्रिस्टल प्यालेससँग बराबरीमा रोकिएको छ ।

पछिल्लो तीन सिजनको विजेता सिटीले २–० को अग्रता जोगाउन नसक्दा क्रिस्टल प्यालेसविरुद्ध शनिवार राति २–२ गाेलको बराबरीमा रोकिएको हो ।

स्टार स्ट्राइकर एर्लिङ हालान्ड विना नै मैदानमा उत्रिएको सिटीले २४औं मिनेटमा ज्याक ग्रिलिसको गोलमा अग्रता दिएको थियो । 

रिको लुइसले खेलको ५४औं मिनेटमा सिटीको अग्रता दोब्बर बनाए । 

तर खेलको अन्त्यतिर सिटीले लय गुमायो । जिन–फिलिप मटेटाले ७६औं मिनेटमा गोल गर्दै प्यालेसलाई खेलमा फर्काएका थिए ।

इन्ज्युरी समयको चौथो मिनेटमा क्रिस्टल प्यालेसले पेनाल्टी पायो । पेनाल्टीमा माइकल ओलिसेले सहजै गोल गर्दै खेल २–२ को बराबरीमा ल्याए । र, क्रिस्टल प्यालेसलाई एक अंक दिलाए ।

यस बराबरीपछि सिटी १७ खेलमा ३४ अंकसहित चौथो स्थानमा नै छ । क्रिस्टल प्यालेस भने १७ खेलमा १७ अंकसहित १५औं स्थानमा छ ।

शनिवार राति नै भएको अर्को खेलमा चेल्सीले सेफिल्ड युनाइटेडविरुद्ध २–० को जीत निकालेको छ । चेल्सीको जीतमा कोल पाल्मर र निकोलस ज्याक्सनले गोल गरेका हुन् ।

जीतपछि चेल्सी १० खेलमा २२ अंक बटुल्दै १०औं स्थानमा उक्लिएको छ । सेफिल्ड भने १७ खेलमा ८ अंकका साथ पुछारमा छ ।