राष्ट्रिय सभामा पार्टीको भागबन्डामा परेका १० उम्मेदवारको टुंगो लगाउन नेपाली कांग्रेसको संसदीय बोर्डको बैठक शुरू भएको छ ।

आन्तरिक छलफल र परामर्शपछि केन्द्रीय कार्यालय सानेपामा कांग्रेसको उम्मेदवार टुंग्याउन बोर्ड बैठक शुरू भएको हो ।

 बोर्ड बैठकपछि कार्यसम्पादन समितिको बैठक बस्ने एक नेताले जानकारी दिए ।

बिहान सत्ता गठबन्धनसँगको १० सिटको भागबन्डा मिलेपछि सभापति शेरबहादुर देउवाले डा. शेखर कोइराला र महामन्त्री गगन थापासँग छलफल गरेका थिए । सो छलफलमा देउवाले इतर पक्षलाई ३ सिट दिने बताएका थिए । तर ४ सिटको अडानमा रहेको शेखर गगन पक्षले यो प्रस्ताव अस्वीकार गरिदियो । 

लगत्तै शेखर समूहको छुट्टै बैठकले १० सिटमा ४ सिटमा दाबी नछोड्ने निर्णय गर्दै सानेपाको जारी बैठकमा सहभागी भएको हो । 

११ माघमा हुने राष्ट्रिय सभा सदस्यको निर्वाचनको लागि भोलि उम्मेदवारी दर्ता हुँदैछ ।