कोशी प्रदेश सभाले पद रिक्त भएको पाँच महिनापछि नयाँ सभामुख चयनको प्रक्रिया अगाडि बढाउने तयारी गरेको छ ।प्रदेश सभा सचिवालयले आज नयाँ सभामुख चयनको प्रक्रिया अघि बढाउने तयारी थालेको हो ।

यसका लागि सत्तारूढ गठबनधनले समेत दबाब दिएको छ । सभामुख चयन प्रक्रिया आजै टुंग्याउने गठबन्धन दलहरूको तयारी छ । 

आजै कोशी प्रदेश सभाले सभामुख पाउने गठबन्धनका एक नेताले बताए । 'आज  प्रदेश सभाले सभामुख पाउँछ,’ गठबन्धनका एक नेताले भने, ‘रातिसम्म लगाएर भए पनि निर्वाचन प्रक्रिया घोषणा हुन्छ र आजै सक्नेगरी निर्वाचन तालिका ल्याउने तयारी छ ।’

सत्ता गठबन्धन यसअघि नै कोशीको सभामुख राप्रपालाई दिन तयार भइसकेका छन् । राप्रपाले सभामुख लिने निर्णयसमेत गरिसकेको छ । राप्रपाले आफ्ना सांसद अम्बरबहादुर विष्टको नाममा सहमति जनाइसकेको छ । राप्रपाले सभामुखमा एमालेले पनि साथ दिनुपर्ने बताएको छ । ‘हामीले एमालेलाई पटक पटक सहयोग गरेका छौं,’ राप्रपाका एक नेताले भने, ‘अब उसले हामीलाई पैँचो तिर्नुपर्छ । ’

सभामुख पद दाबी गरिरहेको प्रतिपक्षी एमाले भने राष्ट्रियसभा चुनावअगाडि सभामुख चयन प्रक्रिया रोक्ने रणनीतिमा छ । राष्ट्रियसभा निर्वाचनमा उम्मेदवारी दर्तापछि आचारसंहिता लाग्ने भन्दै चुनावपछाडि मात्रै सभामुख चयन गर्नु पर्ने एमालेको तर्क छ । 

एमाले संसदीय दलका उपनेता रामबहादुर राना मगरले आचारसंहिता लाग्ने या नलाग्ने भन्ने विषय निष्कर्षमा नपुगी सभामुख चयन नहुने बताए । दलहरूले आचारसंहिता लाग्दैन भन्ने निष्कर्ष निकाल्ने अवस्था नबनेसम्म टुंगोमा पुग्न नसकिने उनको भनाइ छ । 

एमालेका प्रमुख सचेतक रेवतिरमण भण्डारीले पनि निर्वाचन आयोगसँग परामर्श लिएर मात्रै सभामुख चयन प्रक्रिया अगाडि बढ्ने बताए ।  यसअघि पनि एमालेले नै २४ गते कार्यतालिका सार्वजनिक गर्ने सहमति गरेको थियो ।

पुष १७ गते बसेको कार्यव्यवस्था समितिको बैठकमा २४ गते कार्यतालिका सार्वजनिक गर्ने सहमति गरेको थियो ।  कोशी प्रदेशसभाको बैठक पनि आजै बस्दैछ । 

गत साउन १६ गतेदेखि सभामुखविहीन छ । तत्कालीन सभामुख बाबुराम गौतमले गठबन्धनबाट मुख्यमन्त्री बनेका उद्धव थापालाई बहुमत पुर्‍याउन राजीनामा दिएपछि कोशी प्रदेशसभामा सभामुखविहीन छ ।  

कोशीमा एमालेको (उपसभामुखसहित) ४०, कांग्रेसका २९, माओवादीको १३, राप्रपाका ६, नेकपा एकीकृत समाजवादीको ४ र जसपाको १ सांसद छन् ।