२६ जेठ २०८३, मंगलबार
चलचित्र ‘खजुरे ब्रो’को अफिसियल घोषणा गरिएको छ ।
केही दिनदेखि छायांकन भइरहेको चलचित्रको राजधानीमा एक कार्यक्रमकाबीच अफिसियल घोषणा गरिएको हो ।
यो चलचित्रलाई सुरज सुनुवारले निर्देशन गर्दैछन् । कमेडी जनरामा बन्ने चलचित्रको लेखक पनि निर्देशक सुनुवार नै हुन् । चलचित्र धरानमा चर्चित व्यक्ति ‘खजुरे ब्रो’को नाम र उही क्यारेक्टरमा निर्माण गर्न लागिएको फिक्सन चलचित्र रहेको निर्देशक सुनुवारले बताए ।
मोडल नीति शाहले ‘खजुरे ब्रो’मार्फत चलचित्रमा डेब्यु गरेकी छन् । चलचित्रमा उनका साथमा रेयर राई, महेश त्रिपाठी, नविन मानन्धर, प्रकाश भुजेल, विनिता थापा मगर,सुष्मा निरौला, पुस्कर कार्की,मनिष राउत,प्रेम सुब्बा र सुजाता राईको मुख्य भूमिका रहनेछ । डेब्यु अभिनेत्री नीतिले चलचित्रको कथा र सम्पूर्ण टिम मन परेको कारण आफुले काम गरेको र राम्रो चलचित्र बन्नेमा ढुक्क रहेको बताइन् ।
चलचित्रको छायाँकन एकदमै राम्रो भइरहेको पनि नीतिले सुनाइन् ।
कार्यक्रममा बोल्दै रेयर राईले ‘खजुरे ब्रो’ शीर्ष रोलमा काम गर्न पाउँदा धेरै नै हर्षित भएको र च्यालेन्जिङ पनि रहेको बताए ।
कमेडी जनरामा पहिलो पटक काम गर्न लागेकोमा उत्साहित रहेको अभिनेता महेश त्रिपाठीले बताए ।
नवीन मानन्धर र सुरज सुनुवारले निर्माण गर्न लागेको चलचित्रका कार्यकारी निर्माता डायमन्ड उप्रेती हुन् । शिशिर बिसंखेले छायाङ्कन गर्ने चलचित्रको छायाँकन केही दिनअघि सुरु भएको हो । केही दिनको काठमाडौँको छायाँकन सकेर टिम धरान प्रस्थान गर्नेछ ।
दर्शकको चाहना अनुसार पूर्ण मनोरञ्जन दिने उद्देश्यका साथ चलचित्र निर्माण गर्न लागेको कलाकार तथा निर्माता नवीन मानन्धरले बताए । अनमोल गुरुङको सङ्गीत रहने चलचित्र काठमाडौंसहित इटहरी, धरान र दार्जिलिङमा छायाङ्कन हुनेछ ।
चलचित्रको सह निर्माता अनिल मानन्धर र पिकेश मानन्धर रहेका छन् ।
दिब्य दृश्य इन्टरटेन्टमेन्टले निर्माण गर्न लागेको चलचित्रमा इन एसोसियसन विथ मान्द्रो प्रोडक्सन र मल्टी प्रपोज प्रा.लि.को रहेको छ ।
