११ साउन २०८३, सोमबार
स्पेनका एक न्यायाधीशले त्यहाँको फूटबल महासंघका पूर्वअध्यक्ष लुइस रुबिलेसलाई महिला विश्वकपका दौरान खेलाडी जेनी हर्मोसोलाई चुम्बन गरेको घटनामा मुद्दा चलाउन प्रस्ताव गरेका छन् । ती न्यायाधीशले मुद्दाको सुनुवाइका लागि पर्याप्त प्रमाण रहेको बताएका छन् ।
अदालतमा सुनुवाइका क्रममा बयान दिने क्रममा न्यायाधीशले चुम्बनलाई ’सहमतिमा होइन, एकपक्षीय र आश्चर्यजनक’ भनेर वर्णन गरेका छन् ।
जेनीले त्यो चुम्बन ’सहमतिमा नभएको’ बयान दिएपछि रुबिलेस पदच्युत भएका थिए । तर उनले जेनीको दाबीलाई अस्वीकार गर्दै आएका छन् ।
विश्व फूटबल महासंघ (फिफा)ले पनि चुम्बन प्रकरणमा मुछिएका स्पेनिस फूटबल महासंघका निवर्तमान अध्यक्ष लुइस रुबिलेसलाई ३ वर्षको प्रतिबन्ध लगाएको थियो ।
यसअघि फिफाले रुबिलेसलाई स्पेनिस फूटबल संघको अध्यक्षबाट निलम्बन गरेको थियो । उनीमाथि गत भदौमा ९० दिनका लागि निलम्बन गरिएको थियो ।
स्पेनिस फूटबल संघका अध्यक्ष रुबिलेसले विश्वकप विजेता आफ्नै देशकी खेलाडी जेनी हेरमेसोलाई अस्वाभाविक चुम्बन गरेका थिए ।
अष्ट्रेलियामा गत भदौ (२०२३ अगस्ट २०)मा भएको फाइनलमा इंग्ल्यान्डलाई १–० ले हराउँदै स्पेनले पहिलोपटक महिला विश्वकप फूटबलको उपाधि जितेको थियो । सो क्रममा स्पेनिस खेलाडी र पदाधिकारीले खुलेरै खुसी मनाएका थिए ।
ट्रफी तथा मेडल वितरण कार्यक्रममा दौरान स्पेनिस फूटबल संघका अध्यक्ष रुबिलेसले आफ्नो देशका महिला खेलाडीलाई अंगालो हालेर चुम्बन गरेका थिए । यस क्रममा जेनीलाई गरेको चुम्बनले भने विवाद सिर्जना गरेको हो ।
हुन पनि अध्यक्ष रुबिलेसले जेनीको मुखमै चुम्बन गरेका थिए । यसलाई लिएर विश्वभरका सञ्चारमाध्यमहरूले विभिन्न समाचार बनाएका थिए । सञ्चारमाध्यम र सामाजिक सञ्जालमा प्रतिक्रिया दिनेहरूले मुखमा चुम्बन गर्नु खराब नियत भएको बताएका थिए ।
यसपछि स्पेनिस फूटबल महासंघका अध्यक्ष रुबिलेसले यो घटनालाई लिएर माफी मागेका थिए ।
रुबिलेसले खराब नियतले नगरिएको भए पनि त्यो आफ्नो गल्ती भएको बताएका थिए ।
