चितवनको भरतपुरस्थित कृषि क्याम्पसको जग्गामा धुर्मुस–सुन्तली फाउण्डेसनले निर्माण थालेर छाडेको गौतम बुद्ध क्रिकेट रंगशालाका लागि बागमती प्रदेश सरकारले साढे ५२ करोड रुपैयाँ लगानी गर्ने भएको छ । रंगशाला निर्माणका लागि बागमती प्रदेशले ७० प्रतिशत बजेट बेहोर्ने निर्णय गरेको बागमती प्रदेशका भौतिक पूर्वाधार मन्त्री युवराज दुलालले जानकारी दिए । 

मंगलबार बसेको मन्त्रिपरिषद बैठकले रंगशला निर्माणको प्रथम चरणका लागि लागत अनुमानको ७० प्रतिशत प्रदेश सरकारले बेहोर्ने निर्णय गरेको हो । ​

रंगशाला निर्माणका लागि प्रथम चरणमा ७५ करोड रुपैयाँ बराबरको लागत अनुमान गरिएको छ । जसको ७० प्रतिशत ५२ करोड ५० लाख हुन्छ । 

यसअघि संघीय सरकारले गत पुसमा बागमती सरकारसँगको साझेदारीमा रंगशाला बनाउन भरतपुर महानगरपालिकालाई सहमति दिएको थियो । अब उक्त रंगशाला संयुक्त लगानीमा बन्ने निश्चित भएको छ ।

भरतपुर महानगरकी मेयर रेणु दाहालले क्रिकेट खेलको विकासमा यसले महत्त्वपूर्ण भूमिका खेल्ने बताइन् । उनले बागमती प्रदेश सरकारलाई धन्यवाद समेत दिएकी छन् ।