०७ असार २०८३, आइतबार
तामाङ समाज क्रोएसियाको आयोजनामा २८६० औं सोनाम ल्होसार डुक ल्हो कार्यक्रम सम्पन्न भएको छ ।
जग्रब शहरमा आयोजित कार्यक्रममा हजारौं तामाङ तथा गैर तामाङहरू सहभागी भएका थिए । क्रोएसियामा पहिलोपटक ल्होसार कार्यक्रममा गरिएको थियो ।
लामा गुरुले पूजापाठ गरेपछि शुरू भएको कार्यक्रममा दिउँसो २ बजेबाट मेन स्क्वायर कोन्टेसा हलमा वृहत् सांस्कृतिक कार्यक्रमका प्रस्तुति गरिएको थियो ।
तामाङ समाज क्रोएसियाका अध्यक्ष सनिप लामाले कार्यक्रमले नेपालीहरूको पहिचानलाई जगेर्ना गर्न ठूलो सहयोग पुग्ने बताए। 'हामी संसारमा जता गए पनि, जे गरे पनि कला र संस्कृतिलाई सँगै लगेर यसको महत्वलाई युवा पुस्ता माझ उजागर गर्नुपर्छ', उनले भने।
कार्यक्रमका प्रमुख अतिथि एनआरएनए क्रोएसियाका अध्यक्ष साइमन लामाले क्रोएसियामा रहेका तामाङहरू माझमा अब संस्कृतिको रक्षाका लागी एकजुट भएर काम गर्ने र भाषाको जगेर्नाका लागि पनि आफूहरू लागिपर्ने बताए।
कार्यक्रमका विशेष अतिथि युवा समाजसेवी दावा लामाले शुभकामना मन्तव्यका क्रममा तामाङ समाज क्रोएसियाले छोटो समयमा वृहत् कार्यक्रम आयोजना गरेमा धन्यवाद दिए । उनले आगामी दिनमा तामाङ समाजले विभिन्न कार्यक्रमहरू गरी सचेतना दिनसमेत आग्रह गरे ।
त्यस्तै कार्यक्रममा तमु समाज क्रोएसियाका संरक्षक एवं युवा समाजसेवी कमल गुरुङले शुभकामना मन्तव्य राखेका थिए । उनले भर्खरै गठित समाजले ठूलो आँट गरेर ल्होसार कार्यक्रम गरेकोमा धन्यवाद दिए ।
कार्यक्रममा आमन्त्रित गायक रामबाबु योन्जनको विशेष प्रस्तुति दिएका थिए । उनले आधा दर्जन गीतहरू गाएका थिए ।
त्यस्तै क्रोएसियामा रहेका सेलो गायक रमित लामा र मेन्दोमाया गायक प्रनिल वाइबाले कार्यक्रमलाई थप मनोरञ्जनात्मक बनाएका थिए ।
कार्यक्रममा एनआरएनए क्रोएसियाका उपाध्यक्ष सुनिल बम, सुदूरपश्चिमेली समाज, तमु समाज, गोर्खा समाज, मोना क्रोएसियालगायत अन्य संघसंस्थाका प्रतिनिधिहरूको समेत उपस्थिति रहेका थियो ।
