०४ असार २०८३, बिहीबार
प्रमुख प्रतिपक्षी दल नेकपा (एमाले)का केन्द्रीय सदस्यहरूले पार्टीमा दुईखाले सदस्यताको व्यवस्था गर्न नेतृत्वलाई सुझाव दिएका छन् । काठमाडौंमा जारी ७ औं केन्द्रीय समिति बैठकअन्तर्गत दोस्रो दिन भएको समूहगत छलफलमा उनीहरूबाट यस्तो सुझाव आएको हो ।
बागमती प्रदेशका सदस्यहरूको छलफलमा पार्टी सदस्य र साधारण दुईखाले सदस्य राख्न उपयुक्त हुने छलफल भएको केन्द्रीय सदस्य आनन्द पोखरेलले जानकारी दिए । एमालेले पार्टीलाई कसरी व्यवस्थित बनाउन सकिन्छ भन्ने विषयमा ९ वटा समूह बनाएर छलफल गरेको थियो ।
‘पार्टी कसरी चल्नु पर्छ ?, सदस्यको मापदण्ड कस्तो हुनुपर्छ ? पार्टी अधिवेशनलाई कसरी मर्यादित बनाउन सकिन्छ ? नेताको जीवनशैलीमा कसरी एकरुपता ल्याउन सकिन्छ ? भन्नेजस्ता प्रश्नावली बनाएर छलफल गराइएको थियो । पार्टीका अधिवेशन सकेसम्म सहमतिमा गर्ने र सहमति नभए प्रक्रियामा लैजाने भन्ने सुझाव आएको छ,’ पोखरेलले लोकान्तरसँग भने, ‘अधिवेशन लम्बाउन हुन्न भन्ने सदस्यहरूको सुझाव आएको छ ।’
यी सुझावमाथि बिहीवार केन्द्रीय समिति बैठकमा सामुहिक छलफल हुनेछ ।
पछिल्लो समय एमालेका जिल्ला अधिवेशन विवादित बन्दै आएका छन् । यसले गर्दा समयमा अधिवेशन हुन सकिरहेका छैनन् ।
