बैंगलोर,२३ असोज– कर्नाटकको राजधानी बैंगलोरको एक नेशनल पार्कमा सेतो बाघको आक्रमणबाट खाना दिन गएका केयर टेकरको मृत्यु भएको छ । मृतकको नाम अंजी थियो भने उनी नजिकैको हक्की पिक्की कोलोनीमा बस्ने गर्थे ।

करिब एक हप्ता अघि मात्रै नेशनल पार्कको कार्यवाहकका रुपमा आएका उनलाई अस्थायी कर्मचारीका रुपमा नियुक्त गरिएको थियो । बाघको आक्रमणबाट अंजीको मृत्यु भएपछि आइतवार प्रहरी कार्यालयमा उजुरी परेको छ ।

बाघलाई थुनिएको ठाउँमा तीनवटा गेट रहेको छ भने हरेक विहान एउटा गेट खोल्ने गरिन्छ ताकी बाघ वरिपरी घुम्न सकोस् ।
साँझ जनावरहरु फर्केपछि गेट बन्द गरिन्छ । शनिवारको साँझ करिब ७ बजे अंजीे सेतो बाघलाई खाना दिन गएका थिए ।

यसैक्रममा उनले सबै बाघहरु फर्केको, नफर्केको जाँच गर्न पुगेका थिए । नेशनल पार्कका एक वरिष्ठ अधिकारीका अनुसार अंजीले गेट बन्द गर्न ढीला गरेका कारण भित्र रहेका बाघले उनलाई आक्रमण गरेको बताइएको छ । बाघले अंजीको शरीरलाई भित्र खोरमा लगेको थियो ।

आइतवार अंजीको शव क्षतविक्षत अवस्थामा भेटिएको थियो । अहिले नेशनल पार्क बन्द गरिएको छ भने । यस घटनामा प्रहरीमा उजुरी परेको छ । अंजीको शवलाई पोस्टमार्टमको लागि लगिएको छ । एजेन्सी