डा. शेखर कोइराला समूहको बहिष्कारका बीच नेपाली कांग्रेसको विद्यार्थी संगठन नेविसंघको केन्द्रीय समितिको बैठक बसेको छ ।

केही जिल्लामा सभापति चयन र अध्यक्ष दुजाङ शेर्पाले एकलौटी गरेको आरोप डा. शेखर समूहले लगाउँदै आएको थियो । तर शेर्पा समूहले विवादका बीच बैठक नरोकेको हो । 

‘जिल्ला अध्यक्षको विवाद छँदै थियो । अध्यक्षले समन्वयकारी भूमिका निर्वाह गरेर बैठक बोलाउनुभएन । यसमा समस्या देखिएको थियो’, असन्तुष्ट समूहका नेता सुवास पौडेलले लोकान्तरसँग भने, ‘७१० सदस्यीय तदर्थ समितिमा बहुमत सदस्य पनि सहभागी नभइ बैठक बसेको जानकारी पाएका छौं ।’​

आफूहरूविना नै बैठक बसेको भन्दै इतर पक्षले पत्रकार सम्मेलन गरेर विरोध जनाएको छ । 

विवाद भएपछि कोइराला निकट केन्द्रीय सदस्यले मंगलबार सभापति शेरबहादुर देउवालाई उनकै निवास पुगेर ज्ञापनपत्र बुझाएका थिए । शेखर समूहको ध्यानाकर्षणपछि देउवाले नेविसंघ अध्यक्ष शेर्पालाई फोन गरी विवाद मिलाएर मात्रै बैठक गर्न निर्देशन दिएका थिए । तर पूर्व निर्धारित तालिका अनुसार प्रज्ञा भवनमा नेविसंघको केन्द्रीय समितिको बैठक बसेको छ ।

सहभागी एक नेताले अर्को पक्षको बहिष्कारकाबीच बैठकको उद्घाटनमात्रै भएको जानकारी दिए । 

मुख्यगरी अध्यक्ष शेर्पाले बारा, सुनसरी, दोलखा, धादिङ, काठमाडौं, मकवानपुर, नवलपरासीसहितका जिल्लामा अध्यक्ष चयन गर्दा एकलौटी गरेको आरोप इतर पक्षले लगाएको छ । 

सभापति देउवाले गत साउनमा ७१० सदस्यीय तदर्थ समिति गठन गरेका थिए । अध्यक्ष शेर्पालाई छिटो छिटो १२ औं महाधिवेशन गर्ने जिम्मा शेर्पालाई दिइएको छ ।

शेर्पाले असारमा महाधिवेशन गर्ने कार्यतालिका महासमितिको बैठकमा पेश गरेका थिए । 

तर पहिलो बैठकमै विवाद भएको छ ।