०५ साउन २०८३, मंगलबार
नेपालले हङकङमा मंगलवार भएको त्रिदेशीय टी–२० क्रिकेट शृंखलाको उपाधि गुमाएको छ ।
मंगलवार भएको फाइनलमा पपुवा न्युगिनी (पीएनजी)सँग ८६ रनको भारी अन्तरले पराजित हुँदै नेपालले उपाधि गुमाएको हो ।
पीएनजीले दिएको १७२ रनको लक्ष्य पछ्याएको नेपालले निकै खराब ब्याटिङ गर्यो । नेपालले पहिलो ओभरको तेस्रो बलमा पहिलो विकेट गुमाएको थियो । त्यसपछि त्यो क्रम लगातार रह्यो ।
नेपाल १६.३ बलमा अलआउट हुँदै ८५ रनमा सीमित भयो ।
नेपालका लागि सन्दीप जोराले सर्वाधिक १७ रन बनाए । आरिफ शेखले १५ र कप्तान रोहित पौडेलले १२ रन बनाउनबाहेक अन्य ब्याटरले दोहोरो अंकको रन बनाउन सकेनन् ।
लोकेश बम र गुल्सन झाले ६/६, कुशल भुर्तेलले ५, विनोद भण्डारी ४ रन जोडेर आउट भए ।
यस्तै करण केसी ३, विवेक यादव १ रनमा आउट भए । यसैगरी प्रतिश जीसी र आकाश चन्दले कुनै रन जोड्न सकेनन् । आकाश अविजित रहे ।
यसअघि टस हारेर ब्याटिङको निम्तो पाएको पीएनजीले निर्धारित २० ओभरमा ८ विकेट गुमाएर १७१ रन बनाएको थियो ।
नेपालका कुशल भुर्तेल र आकाश चन्दले तीन/तीन, करण केसी र गुल्शन झाले एक/एक विकेट लिए ।
पीएनजीले मंगलवार भएको दोस्रो खेलमा घरेलु टीम हङकङलाई १० विकेटको हराउँदै फाइनल यात्रा तय गरेको थियो । नेपालले भने मंगलवार नै पीएनजीमाथि ८५ रनको जीत निकाल्दै फाइनल पक्का गरेको हो ।
लिग चरणको खेल सकिँदा नेपालले ३ अंक र पीएनजीले २ अंक जोड्दा हङकङले १ अंक जोडेका थिए । अब हङकङले तेस्रो स्थानका लागि हङकङ ‘ए’ सँग खेल्नेछ ।
नेपाल र हङकङबीचको श्रृंखलाको पहिलो खेल भने वर्षाका कारण रद्द हुँदा दुवै टोलीले अंक बाँडेका थिए ।
