आगलागीबाट क्षतिग्रस्त कैलालीको चिसापानीस्थित कर्णाली पुलमा हाल आवतजावत बन्द गरिएको छ । पुलमा यातायात बन्द गरिएपछि अहिले पूर्व–पश्चिम राजमार्गमा चल्ने सवारीसाधन हुलाकी राजमार्गअन्तर्गत टीकापुर–नेपालगन्जको वैकल्पिक मार्ग प्रयोग गरिरहेका छन् ।

सोमबार पुलमाथि गुड्दै गरेको ट्रकमाथि आगलागी हुँदा पुलको १४ सपोर्ट तारमा आंशिक क्षति पुगेको छ । 

सडक विभागअन्तर्गत पुल महाशाखाको प्राविधिक टोलीले क्षतिबारे अध्ययन गरिरहेको छ। क्षतिग्रस्त भएका वस्तुको नमुना लिएर टोलीले ल्याबमा परीक्षण गरिरहेको जनाएको छ । पुलबाट आवागमन नियमित अझै कम्तीमा तीन दिन लाग्ने टोलीले जनाएको छ। 

पुलको सतह र लठ्ठाको तारमा भएको क्षति तथा सवारीसाधन सञ्चालनका लागि गर्नुपर्ने मर्मतसम्भारबारे अध्ययन भइरहेको पुल महाशाखाले जनाएको छ । 

ट्रकमा लागेको आगो करिब चार घण्टापछि नियन्त्रणमा लिइएको थियो। आगलागीबाट ट्रक र त्यसमा रहेका एक हजार एक सय कार्टुन लाइटर जलेर नष्ट भएका थिए ।