भारतको जवाहरलाल विश्वविद्यालयको विद्यार्थी युनियनको निर्वाचनमा फेरि वामपन्थी विद्यार्थी संगठनले जीत हासिल गरेको छ । यसपटक पनि वामपन्थी संगठन मिलेर चुनाव लडेका थिए । जेएनयू निर्वाचन समितिका अध्यक्ष शैलेन्द्र कुमारका अनुसार विद्यार्थी संघमा धनञ्जय अध्यक्ष, अभिजित घोष, महासचिवमा प्रियंशी आर्य र सहसचिवमा मोहम्मद साजिद विजयी भएको बीबीसी हिन्दीले जनाएको छ । 

अध्यक्ष पदमा अखिल भारतीय विद्यार्थी संघ (एआईएसए) का धनन्जयले अखिल भारतीय विद्यार्थी परिषद (एबीभीपी) का उमेशचन्द्र अजमिरालाई पराजित गरेका हुन् । धनञ्जयले २५९८ र उमेशचन्द्र अजमिराले १६७६ मत पाए ।

उपाध्यक्षमा स्टुडेन्ट्स फेडरेशन अफ इन्डियाका अभिजित घोष निर्वाचित भएकी छन् । उनले २४०९ मत पाएकी छन् भने एबीभीपीकी दीपिका शर्माले १४८२ मत पाएकी छिन् ।

महासचिवमा बिरसा अम्बेडकर फुले विद्यार्थी संघ (बाप्सा)की प्रियंशी आर्य विजयी भएकी छन् । उनलाई वाम संगठनको समर्थन थियो । उनले २८८७ मत पाइन् । जबकि एबीभीपीका अर्जुन आनन्दले १९६१ मत प्राप्त गरे।

यसबाहेक यस पटक संयुक्त सचिव पदमा अखिल भारतीय विद्यार्थी महासंघ (एआईएसएफ) का मोहम्मद साजिद विजयी भएका छन् । उनले २५७४ मत प्राप्त गरेका छन् । एबीभीपीका गोविन्द डाँगीले २०६६ मत प्राप्त गरेका छन् ।

जेएनयूमा पछिल्लो विद्यार्थी संघको चुनाव २०१९-२० मा भएको थियो, जसमा पनि वामपन्थी संगठनहरूले जित हासिल गरेका थिए । जेएनयू विद्यार्थी संघको स्थापना भएदेखि नै यसमा वामपन्थी विचारधाराका विद्यार्थी संगठनहरूको प्रभुत्व रहेको छ । हालसम्म भारतीय विद्यार्थी महासंघले २२ पटक अध्यक्ष पद जितेको छ भने अखिल भारतीय विद्यार्थी संघ (एआईएसए) ले ११ पटक अध्यक्ष पद जितेको छ । त्यसैगरी, आरएसएसको विद्यार्थी संगठन एबीभीपीले अहिलेसम्म एक पटक मात्र अध्यक्ष पद जितेको छ ।