कोशी प्रदेशका मुख्यमन्त्री केदार कार्कीको हात्ती मैत्री योजना कार्यक्रमको सार्वजनिक लेखा समितिले प्रश्न उठाएको छ । लेखा समितिले यसबारे पाँच बटा प्रश्न गरेको छ भने पाँच दिनभित्र जवाफ पेस गर्न पर्यटन, वन तथा वातावरण मन्त्रालयलाई पत्राचार गरेको छ । 

मुख्यमन्त्री कार्कीले गत फागुन ९ गतेदेखि १७ गतेसम्म हात्तीमैत्री पदयात्रा गरेका थिए । समितिले ‘कुन खर्च शीर्षकबाट कति रकम खर्च गरियो ? वार्षिक स्वीकृत कार्यक्रम अन्तर्गतको हो कि होइन ? उक्त कार्यक्रममा रकम खर्च गर्दा के कस्ता कानुनी र लेखाका प्रक्रिया अवलम्बन गरियो ? कार्यक्रममा प्रदेश सञ्चित कोषबाट खर्च गर्दा भविष्यमा बेरुजू नहुने आधार के के छन्’ भन्ने प्रश्न गरेको छ ।

कार्यक्रमबाट ‘हात्ती र मानवबिचको द्वन्द्व न्यूनीकरणका लागि ठोस र मूर्त रूपमा के परिणाम प्राप्त हुने उद्देश्य राखियो? र पुरा हुने आधार के के छन् ?’ भनेर पनि समितिले सोधेको छ । ‘मन्त्रालयहरूमा जथाभाबी खर्च गर्ने प्रवृत्ति बढेकाले बेरुजुको चाङ लाग्ने गरेको छ,’ सार्वजनिक लेखा समितिका सभापति  किशोरचन्द्र दुलालले भने ‘अहिले हामीले आलेखमा परीक्षणको  कार्यालयले उठाएका बेरुजुलाई घटाउन पनि निर्देशन दिएका छौ । ’

आज पत्र प्राप्त भएकाले चाडै जबाफ दिने हित पर्यटन, वन तथा वातावरण मन्त्रालयका सचिव विशाल घिमिरेले बताए । 

मुख्यमन्त्री कार्कीसहितको टोलीले ५६ सामुदायिक र चार साझेदारी बन क्षेत्र हुँदै २४३ किलोमिटर पैदल यात्रा गरेका थिए । टोलीमा कार्कीसहित पर्यटन, वन तथा वातावरण मन्त्री गणेश उप्रेती, मन्त्रालयका सचिव विशाल घिमिरे, हात्ती विज्ञहरूसहित दैनिक ८० जना भन्दा बढी सहभागी थिए ।