नेपाल विद्यार्थी संघको १२ औं महाधिवेशन आगामी वर्षको पुस मसान्तभित्र हुने भएको छ ।

संघको केन्द्रीय कमिटीको बैठकले आगामी वर्षको पुसमा महाधिवेशन गर्ने निर्णय गरेको हो ।

नेविसंघका अध्यक्ष दुजाङ शेर्पाको अध्यक्षतामा बसेको बैठकले महाधिवेशनको मिति भने माउ पार्टी कांग्रेससँगको समन्वयमा तोक्ने निर्णय गरेको छ । 

पार्टीसँगको परामर्शमा नेविसंघले एक महिनाभित्र कार्यसम्पादन समिति गठन गर्ने निर्णय पनि गरेको छ ।

केन्द्रीय कार्यसमितिको ७५२ जनाको छ । यसको १० प्रतिशत सदस्य रहने गरी कार्यसम्पादन समिति गठन गर्ने नेविसंघले जनाएको छ ।

संगठन चलाउन प्रत्येक केन्द्रीय सदस्यबाट मासिक ५ सय रुपैयाँका दरले पैसा उठाउने पनि नेविसंघले जनाएको छ ।

लामो समयदेखि नेविसंघको महाधिवेशन हुन सकेको छैन । ​

शेर्पालाई अध्यक्ष बनाएको लामो समयपछि नेविसंघमा जम्बो केन्द्रीय समिति बनाइएको थियो ।