२४ जेठ २०८३, आइतबार
गण्डकीमा सभामुखको समेत हस्ताक्षर जुटाएर गरिएको दाबीका आधारमा मुख्यमन्त्री नियुक्ति गरिएको भन्दै प्रमुख प्रतिपक्षी दल नेपाली कांग्रेसले सर्वोच्च अदालत जाने तयारी गरेको छ ।
प्रदेश प्रमुख डिल्लीराज भट्टले आइतवार एमाले संसदीय दलका नेता खगराज अधिकारीलाई मुख्यमन्त्री नियुक्त गरेका थिए ।
अधिकारीको पक्षमा बहुमत पुर्याउन प्रदेश सभाका सभामुख कृष्ण धितालको नाम माओवादी सांसदको रूपमा गणना गरिएको थियो ।
एमालेका २२, सभामुखसमेत गरेर माओवादीका ८ र स्वतन्त्र हैसियतमा रहेका दीपक मनाङेसमेतको समर्थनमा अधिकारीले बहुमत सांसद आफूसँग रहेको दाबी पेश गरेका थिए ।
कांग्रेसले भने सभामुख तटस्थ रहनुपर्ने भन्दै गैर संवैधानिक रूपमा गरिएको हस्ताक्षरलाई मान्यता नदिन आग्रह गरेको छ ।
निवर्तमान मुख्यमन्त्री एवं प्रदेश सभाका कांग्रेस संसदीय दलका नेता सुरेन्द्र पाण्डेले आइतवार प्रदेश प्रमुखलाई पत्र लेखेर गैर संवैधानिक नियुक्ति नगर्न आग्रह गरेका थिए ।
आफूहरूको आग्रहविपरीत प्रदेश प्रमुखले मुख्यमन्त्री नियुक्त गरेपछि कांग्रेस सर्वोच्च जाने तयारी गरेको हो । ‘गैर संवैधानिक ढंगले गरिएको मुख्यमन्त्री नियुक्तिविरुद्ध हामी सर्वोच्च जाने तयारी गरेका छौं, भ्याएसम्म आइतवार नै रिट दर्ताको तयारी भएको छ’ एक सांसदले लोकान्तरसँग भने ।
मुख्यमन्त्री अधिकारीले आजै शपथ गरेर मन्त्रिमण्डल विस्तारको तयारी गरेका छन् ।
