काठमाडौं २८ असोज– प्रधानमन्त्री शेरबहदुर देउवाद्वारा मन्त्रिपरिषद्मा सिफारिस राप्रपा सांसदहरुको आज (शनिबार) पद तथा गोपनियताको शपथ नभए उनीहरुको मन्त्री पद धरापमा पर्ने भएको छ ।
शनिबार संसदको कार्यकाल सकिने र गैरसांसदलाई मन्त्री बनाउन नपाइने व्यवस्थाका कारण उनीहरुको मन्त्री पद धरापमा पर्ने खतरा बढेको हो ।
संविधानको धारा २९८ को उपधारा ६ मा प्रधानमन्त्रीले मन्त्री नियुक्त गर्दा व्यवस्थापिका संसदका सदस्यहरुबाट गर्नुपर्ने व्यवस्था गरिएको छ ।
एकातर्फ संविधानमा गैरसांसद मन्त्री बन्न नपाउने व्यवस्था रहेको र अर्कोतर्फ शनिवार राती संसदको कार्यकाल सकिने भएकोले प्रस्ताविक मन्त्रीहरुको सपथ अन्योलमा परेको हो ।
राष्ट्रपति कार्यालयले निर्वाचन आयोगसँग परामर्श गरेर मात्र सपथको कार्यक्रम मिलाउने बताएको छ ।
राष्ट्रपति कार्यालयका अनुसार शनिबार राष्ट्रपति कार्यालयमा सपथको कार्यक्रम तय भएको छैन ।
शीतल निवास स्रोतका अनुसार राष्ट्रपति बिद्यादेवी भण्डारीले निर्वाचन आयोगका पदाधिकारीहरुसँग आइतवारमात्र परामर्श गर्नेछिन् ।
देउवाले कमल थापा सहित, जयन्त चन्द, दीलनाथ गिरी र विक्रम थापालाई मन्त्री बनाउन लागेका हुन् ।
