काठमाडौं, २८ असोज— निर्वाचन आयोगले मन्त्रिमण्डल विस्तारमा नरमपना देखाएपछि प्रधानमन्त्री शेरबहादुर देउवाको सिफारिशमा राप्रपाका ४ मन्त्री र ४ राज्यमन्त्रीको सपथ भएको छ ।
शनिबार राती राष्ट्रपति भवन शीतल निवासमा आयोजित विशेष कार्यक्रममार्फत राष्ट्रपति विद्यदेवी भण्डारीले पद तथा गोपनियताको सपथ गराएकी हुन् ।
राप्रपा अध्यक्ष कमल थापाले उपप्रधानमन्त्रीको रुपमा पद तथा गोपनियताको सपथ लिएका छन् । यस्तै दीलनाथ गिरी, विक्रम थापा र जयन्त चन्दले विना विभागिय मन्त्रीको रुपमा सपथ लिएका छन् ।
सो लगत्तै सुशील श्रेष्ठ, क्रान्ता भट्टराई, कुन्ती शाही र भास्कर भद्राले पनि राज्यमन्त्रीको रुपमा सपथ लिए  ।

प्रधानमन्त्री शेरबहादुर देउवाले शुक्रबार नै उनीहरुको पद तथा गोपनियताको सपथ गराउन चाहेको भएपनि राष्ट्रपति कार्यालयले असन्तुष्टि जनाएपछि आज अबेरमात्रै सपथ हुन सकेको हो ।
निर्वाचन आचारसंहिताविपरित सपथ हुन नसक्ने भन्दै राष्ट्रपति कार्यालयले निर्वाचन आयोगसँग परामर्श गर्दा आयोगले कुनै फरक नपर्ने राय दिएपछि राष्ट्रपति कार्यालयले सपथ ग्रहणको कार्यक्रम तय गरेको थियो । यसअघि निर्वाचन आयोगले निर्वाचन आधारसंहिता विपरित मन्त्रिमण्डल विस्तार नगर्न भन्दै आएको भएपनि आज आएर बोलि फेर्दै मन्त्रिमण्डल विस्तार गर्न सकिने बताएको हो ।
देउवाले मन्त्रिमण्डल विस्तार गरेको यो छैटौं पटक हो । देउवाले पछिल्ले समय राप्रपाका ८ जनालाई सरकारमा सहभागि गराएसँगै मन्त्रिपरिषद्को संख्या ६४ सदस्सीय बनेको छ ।
यसअघि २०५२ सालमा ५२ सदस्सीय मन्त्रिमण्डल बनाएर बद्नामी कमाएका देउवाले २०७४ सालमा आइपुग्दा मन्त्रिमण्डलको आकारमा एकपछि अर्को गरी बढाउँदै आफ्नै रेकर्ड तोड्दै आएका छन् ।
यसैबीच देउवाले मन्त्रिमण्डल विस्तार गरेपनि सत्ता साझेदार नेकपा माओवादी केन्द्रले सरकार नछाड्ने जनाएको छ ।
शनिबार बसेको माओवादी शीर्ष नेताहरुको बैठकले सरकारलाई दिएको समर्थन कायमै राख्ने र मन्त्रीहरुलाई पनि फिर्ता नबोलाउने निर्णय गरेको हो ।