बायर लेभरकुजनले जर्मन बुन्डेस लिगा फूटबलमा अपराजित यात्रा कायम राख्दै नयाँ कीर्तिमान रचेको छ । शनिबार राति लिगको अन्तिम खेलमा असबर्गलाई २–१ ले हराएसँगै लेभरकुजनले पूरा सिजन अपराजित रहने पहिलो टोलीका रुपमा कीर्तिमान बनाएको हो ।

यसअघि बुन्डस लिगामा कुनै पनि टोलीले अपराजित यात्रा कायम राख्न सकेका थिएनन् ।

लिगका ३४ खेलमध्ये लेभरकुजन २८ खेलमा विजयी रह्यो भने ६ खेल बराबरी खेल्यो । यसक्रममा उसले ८९ गोल गर्दा २४ गोल मात्र खाएको छ ।

स्पेनिस प्रशिक्षक जाभी एलोन्सो नेतृत्वको टोली यसअघि गत वैशाख २ गते नै लिग उपाधि जितिसकेको छ ।

सबै प्रतियोगितामा लिभरकुजनको अपराजित यात्रा ५१ खेल पुगेको छ । यससँगै उसले यो सिजन तीन उपाधि जित्ने सपना पनि कायमै राखेको छ ।

अब उसले बुधबार डब्लिनमा हुने युरोपा लिगको फाइनलमा एटलान्टाको सामना गर्नेछ । त्यसको तीन दिनपछि जर्मन कपको फाइनलमा काइजरर्स्लटनसँग भिड्नेछ । 

लेभरकुसनले क्लब इतिहासमै पहिलोपटक बुन्डेस लिगाको उपाधि जितेको हो ।

यसअघि लिग नजितेको भएपनि लिभरकुजन सन् २००१–२ को सिजन च्याम्पियन्स लिगको फाइनलसम्म पुगेको थियो ।