१० असार २०८३, बुधबार
काठमाडौं, ३ कात्तिक — अमेरिकी जासूसी संस्था सीआईएका निर्देशक माइक पम्पियोले उत्तर कोरिया अमेरिकालाई आणविक आक्रमण गर्नका लागि सक्षम हुनै लागेको बताएका छन् ।
उनले वाशिङटन अझै पनि कूटनीति र प्रतिबन्धमा विश्वास गर्ने तर सैन्य विकल्प पनि खुला रहेको बताए ।
उत्तर कोरियाले आफू अमेरिकामाथि आक्रमण गर्न सक्षम भइसकेको दाबी गर्दै आएको छ ।
प्योङयाङको क्षेप्यास्त्रमा विज्ञता तीव्र गतिमा अघि बढिरहेको र अमेरिकी जासूसहरूलाई यसको सफलताका बारेमा थाहा पाउन गाह्रो भएको पम्पियोले चेतावनी दिए ।
अघिल्लो हप्ता अमेरिकी विदेशमन्त्री रेक्स टिलरसनले पनि उत्तर कोरियासँगको विवाद कूटनीतिमार्फत हल गरिने बताएका थिए ।
अमेरिकी राष्ट्रपति डोनल्ड ट्रम्पले किम जोङ–उनसँग संवाद गर्न खोजेर समय खेर नफाल्न टिलरसनलाई सार्वजनिक रूपमा आग्रह गरेका थिए ।
बीबीसीबाट
