विनियोजन विधेयक माथिको छलफलका क्रममा स्वास्थ्य मन्त्री नदेखेपछि स्वतन्त्र सांसद डा. अमरेश कुमार सिंह केहीबेर संसद्‌को रोष्टममा उभिएका छन् । 

विनियोजन विधेयकमाथि खर्च कटौती प्रस्ताव पेश गर्न संसद्‌को रोष्टममा पुगेका सांसद सिंहले स्वास्थ्य मन्त्री नहुँदासम्म छलफल रोक्न माग गरे । 

‘स्वास्थ्य मन्त्रीलाई केही कुरा सुनाउन छ, उहाँ नआउदासम्म छलफल यही रोकौं, नत्र म यही उभिरहन्छु’ अमरेशले भने । 

त्यसपछि सभामुख देवराज घिमिरेले एकछिन रोकिन आग्रह गरे । ‘माननीयजी रोकिनु होला, मन्त्रीजी केहीबेरअघि यही हुनुहुन्थ्यो दिसा–पिसाबका लागि बाहिर जानुभएको होला । यही कतै हुनुहुनछ । त्यतिन्जेल अन्य माननीयजीहरू पनि धैर्य गर्नुहोला’ सभामुख घिमिरेले भने । 

आधा मिनेट अमरेश रोष्टममा मौन बसे । त्यसपछि स्वास्थ्य मन्त्री प्रदीप यादव संसद् बैठकमा प्रवेश गरे । ‘मन्त्रीजी आउनुभयो, माननीयज्यू अगाडि बढ्नुस’ त्यसपछि सभामुखले भने । त्यसपछि अमरेशले छलफल शुरू गर्दै मन्त्रीलाई सोधे– ‘के कारणले मधेशमा रेफरल अस्पताल छैन ?’

अर्थ मन्त्रालय विदेशी एजेण्ट मन्त्रालय
सांसद सिंहले अर्थ मन्त्रालय नेपालीको नभई विदेशीको एजेण्टजस्तो बनेको आरोप लगाए । ‘मैले २०७० सालमा पनि भनेको थिएँ– अर्थमन्त्रालय विदेशीको एजेण्ड मन्त्रालय बन्यो, जनताको प्रतिनिधि मन्त्रालय होइन । नेपाली जनताको मन भावनासँग गाइडेड भएको छैन,' उनले भने ।

सांसद सिंहले नेताले जनता ठग्नेबाहेक केही काम नगरेको आरोप लगाए । ‘देशमा निराशा बढेको छ । नैतिक मूल्य शून्यमा झरेको छ, किनकी देशमा नैतिकताको खडेरी छ । नेताले सधैंजस्तै जनतालाई निरन्तर ठगिरहेका छन् । जनताको कुरा सुन्न छाडेर जनताले आफ्नो डम्फु बजाइरहेका छन्’ उनले भने ।