जर्मनीमा जारी युरोकप फूटबल प्रतियोगिताको प्रिक्वार्टरफाइनलअन्तर्गत मंगलवार राति रोमानिया र नेदरल्यान्ड्सबीच खेल भइरहेको छ ।

यो खेल नेपाली समयअनुसार राति ९ः४५ बजे म्युनिखस्थित एलिनाज एरिनामा हुनेछ । 

समूहमा तेस्रो हुँदै अन्तिम १६ मा पुगेको भएपनि नेदरल्यान्ड्स फिफा वरीयतामा रोमानियाभन्दा ४० स्थान माथि छ । 

विगतमा पनि नेदरल्यान्ड्स रोमानियामाथि हाबी हुँदै आएको छ । यसअघि भएका १४ वटा भेटमा रोमानियाले एउटा मात्र जीत निकालेको छ । १० खेलमा पराजित हुँदा ३ खेल भने बराबरीमा सकिएका छन् । 

अन्तिमपटक २०१७ मा मैत्रीपूर्ण खेलमा भेट हुँदा नेदरल्यान्ड्सले रोमानियालाई ३–० गोल अन्तरले पराजित गरेको थियो ।  

यसर्थ आज राति पनि रोमानियामाथि नेदरल्यान्ड्स हाबी हुने फूटबल पण्डितहरूको विश्लेषण छ । नेदरल्यान्ड्स सोही योजनासहित मैदानमा उत्रने छ ।

यद्यपि, बेल्जियमजस्तो टोली रहेको समूहमा विजेता बन्दै अन्तिम १६ मा पुगेकाले रोमानियाको मनोबल उच्च छ । उ आज राति अर्को ‘सरप्राइज’ नतिजा निकाल्ने ध्याउन्नमा हुनेछ ।

अन्तिम १६ कै अर्को खेलमा मंगलवार मध्यराति अस्ट्रिया र टर्की आमनेसामने हुँदैछन् । यो खेल १२ः४५ मा शुरू हुनेछ ।