प्रचण्डप्रति जनार्दनको गम्भीर आरोप– पार्टीमा विधिको कुरा उठाउनेविरुद्ध राज्य शक्तिको प्रयोग गरियो

नेकपा माओवादी केन्द्रका उपमहासचिव जनार्दन शर्माले पार्टीलाई विधि पद्धतिमा चलाउने कुरा गर्दा राज्य शक्तिको दुरुपयोग गरिएको आरोप लगाएका छन् ।

अध्यक्ष पुष्पकमल दाहाल 'प्रचण्ड'प्रति लक्षित गर्दै उनले कमी कमजोरीको कुरा गर्दा पार्टी फुटाइँदै छ भन्ने हल्ला चलाइएको आरोप लगाएका हुन् ।

शनिबार पार्टी स्थायी कमिटी बैठकमा पेश गरेको प्रस्तावमा शर्माले पार्टीमा विधिको कुरा गर्दा डर मान्नुपर्ने अवस्थाको सृजना गरिएको आरोप लगाएका हुन् ।

‘विधि, पद्धतिभित्र संचालित सही आचरणयुक्त पार्टी बनाऔं र चलाऔं भन्दा डर मान्नुपर्ने, धक मान्नुपर्ने, लाञ्छित हुनुपर्ने अवस्था सृजना गरियो । अझ थप दुरुत्साहन गर्न राज्य शक्तिको समेत दुरुपयोग भएको आभाष भयो,’ शर्माले भनेका छन् ।

प्रचण्ड प्रधानमन्त्री रहेको समयमा राज्यका निकायबाट छानबिनको धम्की दिइएको भन्दै शर्माले प्रस्तावका यस्तो कुरा लेखेको माओवादीका एक नेताले जानकारी दिए ।

यसअघिको बैठकमा पनि प्रचण्ड प्रधानमन्त्री रहेको समयमा कृष्णबहादुर महरालाई पक्राउ गरिएकोमा विरोध भएको थियो । 

शर्माले केन्द्रदेखि तलसम्म परिवारवाद हावी भएको बताएका छन् ।

‘पार्टीलाई आम जनताबाट अलग-अलग मात्र पारिएन, माथिदेखि तलसम्म परिवारवाद हावी गराइयो,’ शर्माले भनेका छन्, ‘पार्टीभित्र मुद्दा विशेषमा कमी कमजोरीबारे छलफल र बहसलाई विषयान्तर गर्न पार्टी फुट्दैछ भन्ने हल्ला चलाइयो ।’