२४ जेठ २०८३, आइतबार
भदौ २८ गते हुने ३४ औं कार्यकारिणी समिति र तेस्रो प्रादेशिक कार्यकारिणी समितिका लागि तोकिएको नेपाल इन्जिनियर्स एशोसिएसनको निर्वाचन विवादित बनेको छ ।
एशोसिएसनले गर्न लागेको निर्वाचनविरुद्ध २ वटा उजुरी परेपछि जिल्ला प्रशासन कार्यालयले छानबिनका लागि कागजात माग गरेको हो ।
इन्जिनियरद्वय अन्तिमप्रसिद्ध धितालसमेत थप २ जना र अर्का इन्जिनियर मनीष सडौलाले उक्त निर्वाचन विधान र अन्य नियम–कानून विपरीत रहेको दाबी गर्दै सीडीओ कार्यालयमा उजुरी दिएका थिए ।
’संस्थाका गतिविधिहरू प्रचलित संस्था दर्ता ऐन, २०३४ तथा नियमावली, २०३४ को प्रावधानअनुरुप हुनुपर्ने व्यवस्था भएको छ । तर निर्वाचन भने त्यस बाहिरबाट हुन लागेकाले छानबिन होस् भन्ने हाम्रो माग हो,’ उनीहरूले दर्ता गराएको उजुरीमा भनिएको छ ।
उजुरीमा उम्मेदवारले नभई सिधै उनीहरू सम्बद्ध संस्थाले उम्मेद्वारी शुल्क तिरेको आरोप लगाइएको छ ।
हेर्नुहोस् उजुरीको अंश :
सीडीओ कार्यालयले संस्थाको निर्वाचन स्वीकृति विधान तथा कार्यविधिको परिधिभित्र रहेर हुन लागेको हो-होइन भनेर प्रश्न गरेको छ ।
’विधान तथा कार्यविधिको परिधिभित्र रहेर निर्वाचन हुन लागेको पुष्टि हुने आवश्यक कागजातसहित ३ दिनभित्र यस कार्यालयमा उपस्थित भई पेश गर्नुहुन आदेशानुसार अनुरोध छ,’ सीडीओ कार्यालयले लेखेको पत्रमा उल्लेख छ ।
