०७ असार २०८३, आइतबार
गाई जात्राको भोलिपल्ट मनाइने रोपाइँ जात्रामा देशका शीर्ष नेतालाई रावणको रूपमा चित्रण गर्ने गरी प्रदर्शनी गरिएको छ ।
बुधबार काठमाडौंको बौद्धमा आयोजित रोपाइँ जात्रामा दलका शीर्ष नेताको फोटो राखेर व्यंग्य गरिएको हो ।
कालो वस्त्र धारण गरेकी एक स्कूले विद्यार्थीले रावणको दशानन अवतारमा नेताको फोटो प्रदर्शन गरेकी हुन् ।
१० वटा टाउको भएकाले रावणलाई ‘दशानन’ भनिने धार्मिक ग्रन्थमा उल्लेख छ ।
१० टाउकोमा कांग्रेस सभापति एवं पूर्व प्रधानमन्त्री शेरबहादुर देउवा, नेकपा एकीकृत समाजवादीका अध्यक्ष माधवकुमार नेपाल, एमाले सचिव योगेश भट्टराई, पूर्व प्रधानमन्त्री एवं माओवादी अध्यक्ष पुष्पकमल दाहाल ‘प्रचण्ड’ र कांग्रेस महामन्त्री गगन थापाको फोटो राखिएको छ ।
यस्तै, परराष्ट्र मन्त्री आरजु देउवा, रास्वपा सभापति रवि लामिछाने, पूर्व प्रधानमन्त्री झलनाथ खनाल, राप्रपा अध्यक्ष राजेन्द्र लिङ्देन र प्रधानमन्त्री एवं एमाले अध्यक्ष केपी शर्मा ओलीको फोटो टाउकोका राखिएको छ ।
बौद्धमा आयोजित कार्यक्रममा काठमाडौंका मेयर बालेन शाह प्रमुख अतिथि थिए ।
यसअघि मंगलबार भक्तपुरमा पनि प्रधानमन्त्री ओली र परराष्ट्रमन्त्री देउवालाई व्यंग्य गर्दै प्रदर्शन गरिएको थियो ।
