२६ जेठ २०८३, मंगलबार
सहकारीको रकम अपचलनबारे छानबिन गर्न गठित संसदीय छानबिन विशेष समितिको म्याद १५ दिन थप हुने भएको छ ।
मंगलवार बस्ने प्रतिनिधिसभाको सम्भावित कार्यसूचीमा सहकारी छानबिन समितिको म्याद थपसम्बन्धी प्रस्ताव पारित गर्ने तयारी रहेको संसद सचिवालयका प्रवक्ता एकराज गिरीले लोकान्तरलाई सोमवार जानकारी दिए ।
समितिका सभापति सूर्य थापाले प्रतिनिधिसभाका सभामुख देवराज घिमिरेलाई भेटेर समितिको म्याद थपका लागि प्रस्ताव राखेको उनले बताए । ‘सभापति थापाले काम अझै बाँकी रहेकाले म्याद थपका लागि प्रस्ताव गरेको बताउनुभएको छ,’ प्रवक्ता गिरीले भने ।
यसपछि सभामुखले उक्त विषय प्रतिनिधिसभा बैठकको कार्यसूचीमा राख्न लगाएको उनकाे भनाइ छ ।
पूर्वउपप्रधान तथा गृहमन्त्री रवि लामिछानेलगायत विभिन्न व्यक्ति र विभिन्न सहकारीका संचालकमाथि सहकारी ठगीको आरोप लागेको छ । यस प्रकरणको छानबिन गर्न नेकपा (एमाले)का सांसद थापाको सभापतित्वमा छानबिन समिति गठन भएको थियो । लामिछानेलगायत विभिन्न व्यक्तिसँग समितिले सोधपुछ गरिसकेको छ ।
तीन महिना समय तोकिएको समितिको पहिलो बैठक २३ जेठमा बसेको थियो । त्यसअनुसार २२ भदौमा समितिको म्याद सकिँदैछ । अब १५ दिनको म्याद थप्ने राजनीतिक सहमति भइसकेको बताइएको छ ।
