ऊर्जा, जलश्रोत तथा सिँचाई मन्त्रालयले गत असोज १२ गते कुलेखानी जलविद्युत आयोजनाको ड्यामको दुवै ढोका खोल्दा भएको जनधनको क्षतिको छानबिन गर्न ५ सदस्यीय समिति गठन गरेको छ ।

मन्त्री दीपक खड्काले मन्त्रालयका सहसचिवको नेतृत्वमा ५ जनाको छानबिन समिति गठन गरेको लोकान्तरलाई बताए ।

'कुलेखानी ड्याम खोलेपछि भएको क्षतिबारे छानबिन गर्न मन्त्रालयले सचिवस्तरीय निर्णयबाट ५ सदस्यीय छानबिन समिति गठन गरेको छ,' उनले भने, 'स्थानीय पीडितहरूले यसबारे एक साता अघि नै मन्त्रालयमा गुनासो गरेका थिए ।'

उनले विद्युत प्राधिकरणले प्रबन्ध निर्देशक कुलमान घिसिङको ठाडो आदेशमा जोखिम र क्षतिको सामान्य ख्याल समेत नराखी ड्याम खोल्दा इन्द्रसरोवर गाउँपालिकामा धनजनको क्षति भएको बताए ।

गत असोज १२ गते एकै पटक कुलेखानीको ड्यामका दुई वटा ढोका खोलेर झन्ड़ै ४/४ मिटर पानीको निकासी गरिएको थियो ।

मकवानपुर क्षेत्र नम्बर २ का प्रतिनिधिसभा सदस्य समेत रहेका महेश बर्तोलाले स्थानीय पीडितसँगै गत साता मन्त्री दीपक खड्कालाई भेटेका थिए ।

पीडितले तत्काल छानबिन तथा जाँचबुझ समिति बनाउन, कमजोरी गर्ने कर्मचारीलाई कारबाही गर्न, भएको क्षति र नोक्सानीप्रति जवाफदेही भई पीडितलाई आवश्यक क्षतिपूर्ति उपलब्ध गराउनलगायतका माग राखेका थिए ।

आजै विद्युत प्राधिकरणका प्रबन्ध निर्देशक घिसिङलाई मन्त्रालयले १५ बुँदे स्पष्टिकरण माग गरेको छ ।  

पढ्नुहोस् यो पनि:

ऊर्जाले कुलमानसँग माग्यो प्राधिकरणको ४ वर्षको वित्तीय र खरिद विवरण