११ साउन २०८३, सोमबार
नयाँ दिल्ली–बङ्गलादेशका क्रिकेट खेलाडी शकिब अल हसनले विद्यार्थी नेतृत्वको आन्दोलनका क्रममा मौन बसेकोमा माफी मागेका छन् ।
अपदस्थ प्रधानमन्त्री शेख हसिनाको पार्टीका दर्जनौं व्यक्तिहरूमध्ये ३७ वर्षीय शकिबले पनि बङ्गलादेशमा भएको विद्रोहको क्रममा प्रदर्शनकारीहरूमाथि घातक प्रहरी दमन र हत्याको लागि अनुसन्धानको सामना गरिरहेका छन् ।
बङ्गलादेश राष्ट्रिय क्रिकेट टोलीका पूर्वकप्तान शाकिब सन् २०२४ को शुरूमा भएको संसदीय निर्वाचनमा सांसद निर्वाचित भएका थिए । अगस्टमा हसिनाको राजीनामापछि संसद् विघटन नभएसम्म र अशान्तिको चरम समयमा छिमेकी भारतमा निर्वासित नभएसम्म उनले बङ्गलादेशको सांसदको रूपमा सेवा गरेका थिए ।
शकिबले बुधवार आफ्नो आधिकारिक फेसबूक पेजमा एक लामो नोट लेख्दै प्रदर्शनका क्रममा नबोलेकोमा माफी मागेका छन् ।
नोटमा भनिएको छ, ‘आफ्नो जीवन उत्सर्ग गर्ने सबै विद्यार्थीहरूप्रति म श्रद्धाञ्जलि अर्पण गर्दछु ।’
मृतकका आफन्तजनप्रति समवेदना प्रकट गर्दै उनले भनेका छन्, ‘कुनै पनि कुराले कसैलाई गुमाउनुको रिक्ततालाई भर्न सक्दैन, तर मेरो मौनताबाट आहत भएका सबैसँग म क्षमा याचना गर्दछु । यदि म तपाईंको ठाउँमा भएको भए म पनि दुःखी हुने थिएँ ।’
बङ्गलादेशको स्वास्थ्य मन्त्रालयका अनुसार हसिनालाई सत्ताच्युत गर्नुअघि भएको झडपमा परी ७०० भन्दा बढी व्यक्तिको मृत्यु भएको थियो ।
आन्दोलनका समय शकिब क्यानडामा घरेलु ट्वन्टी–२० क्रिकेट प्रतियोगिता खेलिरहेका थिए र त्यसपछि उनी बङ्गलादेश फर्किएका छैनन् ।
हसिनाको बहिर्गमनपछि देशमा गठित अन्तरिम सरकारको स्वीकृतिमा उनले बङ्गलादेशी टोलीसहित पाकिस्तान र भारतको भ्रमण गरेका छन् ।
हसिनाका विरोधीहरूले बहिष्कार गरेको जनवरीमा सम्पन्न निर्वाचनबाट शकिब सांसदमा निर्वाचित भएका थिए ।
उनले आफ्नो गृहनगरको विकासमा योगदान गर्न चाहेकाले आफूले चुनाव लड्ने निर्णय गरेको बताएका छन् ।
‘यदि आफ्नो तोकिएको स्थान छैन भने बङ्गलादेशमा विकासमा प्रत्यक्ष भूमिका निर्वाह गर्न कठिन छ,’ उनले भनेका छन् ।
शकिबले गत महिना अन्तर्राष्ट्रिय क्रिकेटबाट सन्यासको घोषणा गरेका थिए । तर यसै महिनाको अन्त्यमा दक्षिण अफ्रिकासँग घरेलु मैदानमा आफ्नो अन्तिम टेस्ट श्रृङ्खला खेल्न चाहेको बताएका छन् ।
‘आफ्ना सबै प्रशंसकहरूसँग बिदाइ हुने अवसर मेरो इच्छा हो,’ उनले आफ्नो फेसबूक पोस्टमा भनेका छन्, ‘तपाईंहरू सबैलाई थाहा छ, म चाँडै नै आफ्नो अन्तिम खेल खेल्नेछु । म आशा गर्दछु कि मेरो बिदाइको घडीमा तपाईंहरू सबै मेरो साथमा हुनुहुनेछ ।’
