राष्ट्रपति रामचन्द्र पौडेलसमक्ष नेपालका लागि विभिन्न तीन देशका राजदूतले आ–आफ्नो ओहदाको प्रमाणपत्र पेश गरेका छन् ।

नवनियुक्त राजदूतहरूले राष्ट्रपति भवनमा आज आयोजित छुट्टाछुट्टै विशेष समारोहमा आ–आफ्नो ओहदाको प्रमाणपत्र पेश गरेका हुन् राष्ट्रपतिको कार्यालयले जनाएको छ ।

समारोहमा इजरायलका आवासीय राजदूत श्मुलिक एरी बास, स्पेनका गैरआवासीय राजदूत जुआन एन्टोनियो मार्च पुजोल र न्युजिल्यान्डका गैरआवासीय राजदूत पैट्रिक जोन राटाले ओहदाको प्रमाणपत्र पेश गरेका हुन् ।

उक्त समारोहमा परराष्ट्रमन्त्री डा आरजु राणा देउवालगायत नेपाल सरकारका  उच्चपदस्थ अधिकारीहरूको उपस्थिति रहेको थियो ।

नवनियुक्त राजदूतहरूलाई काठमाडौंस्थित होटल डुसिट प्रिन्सेसदेखि राष्ट्रपति भवनसम्म रिसल्लासहितको बग्गीमा सवार गराइएको थियो ।