०४ साउन २०८३, सोमबार
कोशी प्रदेशमा करिब अढाई अर्बको लगानीमा चार वटा पदमार्ग निर्माण गरिने भएको छ ।
स्विस सरकार विकास सहयोग परियोजना अन्तर्गत एक अर्ब ३५ करोड १५ लाख, कोशी प्रदेश सरकारको ४५ करोड ८७ लाख र २९ वटा पालिकाको ४४ करोड ६७ लाख लागतमा चार वटा पदमार्ग निर्माण गरिने भएको हो ।
चार वर्षे परियोजना सञ्चालनका लागि कोशी प्रदेश सरकार र स्विस दूतावासबीच सम्झौता भएको छ । परियोजना अन्तर्गत चियाबारी पदमार्ग (इलाम-फिक्कल-श्रीअन्तु ), फाल्गुनन्द पदमार्ग (फिदिम- छिन्ताप्पु-सन्दकपुर-माइपोखरी-इलाम), लालिगुँरास पदमार्ग (लुम्लिङ्टार-खादबारी-नुम-गुफापोखरी-बसन्तपुर-जलजले-तीनजुरे मिल्के), मुन्दुम पदमार्ग (तावाभन्ज्यनङ-टेम्केडाडा-हासपोखरी-साल्पा पोखरी- सिलिचुङ चुली) पदमार्ग निर्माण हुनेछ ।
२९ वटा पालिकामा निर्माण हुने चार वटा पदमार्ग ४०० किलोमिटरको हुनेछ ।
परियोजनाबाट १ लाख स्थानीयले प्रत्यक्ष रूपमा लाभ लिने अनुमान गरिएको छ । पदमार्गको निर्माण तथा पुनः निर्माणका क्रममा ४ लाख दिन बराबरको रोजगारी सिर्जना गर्ने प्रदेश सरकारले जनाएको छ।
१ हजार जनालाई पर्यटन सम्बन्धी सीप विकासका लागि तालिम दिइनेछ । पदमार्गमा होमस्टे, लज र अन्य आतिथ्य सेवाको विकास गर्ने लक्ष्य रहेको बताइएको छ । चार वर्षको अवधिमा आन्तरिक तथा बाह्य गरि ७८ हजार पर्यटकले पदमार्ग क्षेत्र भ्रमण गर्ने अनुमान गरिएको छ । पालिकाहरूसँग प्रदेश सरकारले सम्झौता समेत गरेको छ ।
सम्झौता हस्ताक्षरका क्रममा मुख्यमन्त्री हिक्मतकुमार कार्कीले प्रदेश विकासको मुख्य आधार पर्यटन रहेको बताए । चार वटा पदमार्ग पर्यटन क्षेत्रमा गेम चेन्जर परियोजना बन्ने बताए ।
विश्वलाई चिनाउनका लागि पर्यटन क्षेत्र महत्त्वपूर्ण हुने उनको भनाइ छ । २०८२ साललाई पर्यटन वर्ष घोषणा गरेको प्रदेश सरकारले पदमार्गले थप टेवा पुग्ने विश्वास गरिएको छ ।
