०८ साउन २०८३, शुक्रबार
युक्रेनी सैनिकविरुद्ध रासायनिक हतियार प्रयोगको आरोप खेपिरहेका एक शीर्ष रुसी जनरल मस्कोमा भएको बम विष्फोटमा मारिएका छन् ।
समाचार संस्था रोयटर्सका अनुसार रूसको न्यूक्लियर, बायोलोजिकल र केमिकल प्रोटेक्शन टुप्सका प्रमुख लेफ्टिनेन्ट जनरल इगोर किरीलोभको मृत्यु मस्कोको रियाजनस्की प्रोस्पेक्टस्थित एउटा अपार्टमेन्ट भवनबाहिर भएको बम विष्फोटमा भएको हो ।
घटनाको प्रारम्भिक विवरणअनुसार बम एक इलेक्ट्रिक स्कुटरमा लुकाइएको थियो । उक्त विष्फोटमा किरीलोभका सहायकको पनि मृत्यु भएको छ ।
रुसी टेलिग्राम च्यानलहरूमा पोस्ट गरिएका तस्वीरहरूमा भवनको क्षतिग्रस्त प्रवेशद्वार देखिएको छ, जहाँ भग्नावशेष र रगतले लतपतिएका दुई शवहरू फेला परेका छन् ।
रोयटर्सले घटनास्थलबाट खिचेको फुटेजमा प्रहरीले घटनास्थलमा घेरा लगाएको देखिएको छ । अनुसन्धान अधिकारीहरूले यसलाई आतंकवादसँग जोडेर हेर्न सकिने भन्दै प्रारम्भिक प्रतिक्रिया दिएका छन् ।
युक्रेनले किरीलोभमाथि युद्धमैदानमा प्रतिबन्धित रासायनिक हतियार प्रयोगको आरोप लगाउँदै आएको थियो । यही आरोपमा गत अक्टोबरमा बेलायतले पनि किरीलोभमाथि प्रतिबन्ध लगाएको थियो ।
ब्रिटेनले उनलाई रायट कन्ट्रोल एजेण्ट र क्लोरोपिक्रिन नामक विषाक्त ग्याँसको प्रयोगमा संलग्न रहेको आरोप लगाएको हो । रुसले युक्रेनले लगाएको आरोप अस्वीकार गरेको छ । किरीलोभ आफैंले राज्य सञ्चालित टेलिभिजनहरूमा युक्रेनलाई न्यूक्लियर सुरक्षा प्रोटोकलको उल्लंघन गरेको आरोप लगाउने गरेका थिए ।
मस्कोले फेब्रुअरी २०२२ मा युक्रेनविरुद्धको युद्ध शुरू भएयता युक्रेनले आफ्नो भूमिभित्र लक्षित हत्याहरू गर्दै आएको आरोप लगाउने गरेको छ । यस घटनालाई रुसले युक्रेनको संलग्नतामा भएको लक्षित हत्यासँग जोडेको छ ।
