नवनिर्वाचित अमेरिकी राष्ट्रपति डोनाल्ड ट्रम्पले पनामा नहरमा लिइने कर नघटाइए अमेरिकाले हस्तक्षेप गर्ने चेतावनी दिएका छन् ।

उनले पनामामा पानीजहाज र सैन्य जहाजले अत्याधिक शुल्क तिर्नुपर्ने विषय हास्यास्पद रहेको भन्दै यसको आलोचना गरे ।

एक सार्वजनिक कार्यक्रममा ट्रम्पले भने, 'पनामाले लिएको शुल्क हास्यास्पद र अत्यधिक अनुचित छ । मैले अर्को महिनामा पदभार ग्रहण गरेपछि यसलाई तुरुन्तै रोकिदिन्छु ।'

उनले यस्तो टिप्पणी गरेपछि पनामाका राष्ट्रपति जोसे राउल मुलिनोले पनामाको सार्वभौमसत्ता र स्वतन्त्रतामा कुनै पनि देशले हस्तक्षेप गर्न नसक्ने स्पष्ट पारेका छन् ।

एक वक्तव्यमा उनले भनेका छन्, 'हामीले पानामाको प्रत्येक वर्गमिटरलाई आफ्नो देशको भूमि मान्दछौं ।'

ट्रम्पले टर्निङ प्वाइन्ट युएसका समर्थकलाई सम्बोधन गर्दै पनामामा हस्तक्षेप गर्ने बताएका थिए । उक्त समर्थक समूह ट्रम्पको विचारधारानिकट मानिन्छ ।

ट्रम्पले यसअघि पनामा नहरलाई अमेरिकाको 'महत्वपूर्ण राष्ट्रिय सम्पत्ति' भनेका थिए । यदि पनामाले ढुवानी दर नघटाएमा त्यसलाई छिटो अमेरिकालाई हस्तान्तरण गर्नुपर्ने ट्रम्पको भनाइ थियो ।

पानामा नहरको लम्बाइ ८२ किलोमिटर छ र यो एटालान्टिक र प्रशान्त महासागर बीचको प्रमुख मार्ग हो । यसलाई सन् १९०० को दशकमा बनाइएको थियो । सन् १९७७ सम्म यसको नियन्त्रण अमेरिकासँग थियो ।

यस नहरबाट प्रतिवर्ष १४ हजार पानी जहाज यात्रा गर्छन् ।

ट्रम्पले मेक्सिको र क्यानडाबीचको व्यापारिक अभ्यासलाई पनि आलोचना गर्दै आएका छन् । उनले मेक्सिकोलाई लागूऔषध र आप्रवासीहरूको समस्या उत्पन्न गर्ने गरेको आरोप लगाएका छन् ।