०५ साउन २०८३, मंगलबार
काठमाडौं, ३० कात्तिक — अमेरिकाको न्युयोर्कमा जीसस क्राइस्टको शताब्दियौं पुरानो पेन्टिङ लगभग ४७ अर्ब रुपैयाँमा बिकेको छ ।
येशुको यो चित्र पाँच सय वर्ष पुरानो हो । लियोनार्दो दा भिन्चीले बनाएको चित्रको नाम साल्भादोर मुंडी अर्थात् विश्वको संरक्षक हो ।
चित्रको लिलामीले संसारमा सबभन्दा महंगो कलाकृतिको कीर्तिमान बनाएको छ ।
सुप्रसिद्ध कलाकार दा भिन्चीको सन् १५१९ मा मृत्यु भएको थियो ।
यति महंगो मूल्य तिरेर चित्र किन्ने मानिसको नाम गोप्य राखिएको छ ।
न्युयोर्कमा भएको लिलामीमा २० मिनेटसम्म टेलिफोनमा कुरा गरेर किन्ने व्यक्तिले ४० करोड डलरको अन्तिम बोली लगाएका थिए ।
फीससमेत गरी यसको मूल्य ४५ करोड डलर पुग्यो ।
कुनै समयमा पेन्टिङलाई जम्मा ६० डलरमा लिलाम बिक्री गरिएको थियो । त्यतिखेर यो चित्र दा भिन्चीको कुनै चेलाले बनाएको मानिएको थियो । तर यो भिन्चकै चित्र भएको पत्ता लागेको छ ।
यो पेन्टिङ १५औं शताब्दीमा बेलायतका राजा चार्ल्स प्रथमको सम्पत्ति थियो ।
बीबीसीबाट
