०७ असार २०८३, आइतबार
चितवन, ३० कात्तिक– चितवन जिल्ला सुरक्षा समितिले चुनावी सुरक्षा चुनौतीको रुपमा नेत्रबिक्रम चन्द ‘विप्लव’ नेतृत्वको पार्टीलाई पहिलो नम्बरमा राखेको छ । पूर्वप्रधानमन्त्री समेत रहेका माओवादी अध्यक्ष प्रचण्डको चुनावी क्षेत्रका कारण चर्चामा रहेको चितवन सुरक्षाका दृष्टिकोणले समेत संवेदनशील रहेको जिल्ला प्रशासन कार्यालयको ठहर छ ।
मुख्य निर्वाचन अधिकृतको कार्यालयले निर्वाचन व्यवस्थापन एवम् आचारसंहितासम्बन्धी प्रतिनिधिसभा सदस्य उम्मेदवारबीच गरेको अन्तक्र्रिया कार्यक्रममा प्रमुख जिल्ला अधिकारी नारायणप्रसाद भट्टले चितवनको चुनावको चुनौतीहरुमा ‘विप्लव समूह’ रहेको बताए ।
उम्मेदवारका कार्यकर्ताहरुबीच चुनावी सभाहरुमा हुने आरोप–प्रत्यारोप, आचारसंहिता उल्लंघनका विषयलाई लिएर हुने झैझगडा र र्याली र जुलुसहरुमा हुने जम्काभेटमा झडप हुने स्थिति पनि चुनावको चुनौती रहेको प्रजिअ भट्टले बताए । मतदान केन्द्र र स्थलहरुमा हुने सामान्य व्यवस्थापकीय कमजोरी र उम्मेदवारहरुको अवलोकनलाई लिएर मतदानस्थल र केन्द्रहरुमा हुने झगडाहरु पनि चुनावको चुनौती देखिएको उनको भनाइ छ ।
नेपाल प्रहरीको मोबाइल टोली, रिजर्भ र सिभिल टोली, सशस्त्र प्रहरीको मोबाइल र स्ट्राइकिङ टोली, नेपाली सेनाको टुकडी तथा बेस र राष्ट्रिय अनुसन्धानको इन्टिलिजेन्स समूह पनि परिचालन गरिएको प्रजिअ भट्टले जानकारी दिए । उनले तीन तहको सुरक्षा व्यवस्था रहने बताए । ‘पहिलो घेरामा नेपाल प्रहरी, दोस्रो घेरामा सशस्त्र र तेस्रो घेरामा नेपाली सेनाले निर्वाचनको सुरक्षा गर्नेछ,’ उनले भने ।
जिल्लामा नेपाल प्रहरीका मात्रै तीन हजार २९६ जना परिचालन हुनेछन् । म्यादी प्रहरी एक हजार ७१० छन् । जिल्लाका १६१ स्थलका ४०८ मतदान केन्द्र छन् । भित्री सुरक्षा नेपाल प्रहरी, बाहिरी सुरक्षा नेपाली सेनाको हुनेछ ।
५२ मतदानस्थललाई अतिसंवेदनशील र १०९ मतदानस्थललाई संवदेनशीलको सूचीमा राखिएकाले उच्च सतर्कता अपनाइने प्रजिअ भट्टले बताए ।
