१० असार २०८३, बुधबार
प्रधानमन्त्री केपी शर्मा ओलीले पश्चगामी बहस शुरू गरेको भन्दै नेकपा माओवादी केन्द्रकी नेतृले संसद्भित्र जनयुद्धको पक्षमा नारा लगाएकी छिन् ।
सोमबार बसेको प्रतिनिधिसभा बैठकको शून्य समयमा सांसद ज्ञानु बस्नेत सुवेदीले जनयुद्ध जिन्दावाद भन्दै नारा लगाएकी हुन् ।
नेपाली जनताको तर्फबाट सचेततापूर्वक थालनी गरिएको बलिदानी दिवसलाई अपमान गर्नेगरी प्रधानमन्त्री ओलीले हिंसा भनेकोमा उनले खेद व्यक्त गरिन् ।
‘जनयुद्ध दिवस आउन ३ दिन बाँकी रहेको समयमा प्रधानमन्त्रीबाट बिनाप्रसंग हिंसा भनेको सुन्नु परेको छ । संसद्मा पनि हिंसाको सुगा रटाइ गरिरहेका छन् । अहिले आएर जनयुद्धलाई हिंसा भनिएकोमा खेद व्यक्त गर्छु,’ उनले संसद्मा भनिन्, ‘भनिरहने छु, महान् जनयुद्ध जिन्दावाद, जिन्दावाद । लाल सलाम ।’
यसअघि शुक्रबार बसेको प्रजातन्त्र दिवस मूल आयोजक समितिको बैठकमा प्रधानमन्त्री ओलीले माओवादी जनयुद्ध नभई हिंसा भएको टिप्पणी गरेका थिए ।
