०५ साउन २०८३, मंगलबार
काठमाडौं महानगरपालिकाका प्रमुख प्रशासकीय अधिकृत सरोज गुरागाईंलाई कर्मचारी र जनप्रतिनिधिले पहरा दिएर कार्यालय प्रवेश गराएका छन् ।
महानगर प्रमुख बालेन्द्र साहले गुरागाईंलाई रोक्न नगर प्रहरी परिचालन गरे पनि उपमेयर सुनिता डंगोल तथा वडाध्यक्षहरूसहित जनप्रतिनिधि र महानगरका कर्मचारीले उनलाई कार्यालय प्रवेश गराएका हुन् ।
कार्यकक्षको ढोका समेत फोरेर उनलाई प्रवेश गराइएको थियो ।
काठमाडौं टावरको नक्सा पासमा अनियमितता गरेको आरोप लगाउँदै बालेनले गत पुस ५ गते प्रशासकीय अधिकृतलाई हटाउने निर्णय गरेका थिए । तर, आन्तरिक छानबिनले उनी निर्दोष देखिएका थिए ।
त्यसपछि संघीय मामिला मन्त्रालयले गुरागाईंलाई नै प्रमुख प्रशासकीय अधिकृत बनाएर पठाएको थियो ।
मन्त्रालयले खटाएको कर्मचारीलाई महानगरले हाजिर गर्न नदिने भनेपछि सरकारसँग महानगरको खटपट चलिरहेको छ ।
कर्मचारी नदिएको भन्दै बालेनले सरकारविरुद्ध शृंखलाबद्ध स्टाटस लेखेका थिए ।
गुरागाईंलाई हटाउने बालेनको एकल निर्णयमा उपमेयर सुनिता डंगोल विपक्षमा थिइन् ।
