सत्तारुढ दल नेपाली कांग्रेसकी सांसद चन्दा चौधरीले आतंकवादविरुद्धको लडाइमा नेपाल सदैव भारतको पक्षमा रहेको बताएकी छिन् । काश्मिरको पहलगाममा भएको आतंकवादी हमलाको नेपालले निन्दा र भर्त्सना गरेको उनले बताइन् । 

आइतवार बसेको प्रतिनिधि सभा बैठकको विशेष समयमा सांसद चौधरीले नेपाली नागरिक सुदीप न्यौपानेसहित सहित २६ जना निशस्त्र र निर्दोष व्यक्तिलाई गरिएको हत्या आतंकवाद बाहेक अरु केही हुन नसक्ने बताएकी हुन् । 

‘आतंकवादले मानवतालाई सधैं क्षति पुर्‍याउने गरेको छ । आतंकवाद विरुद्धको लडाइमा नेपाल सधैं भारतसँग छ । यसपटक पनि नेपाल भारतको पक्षमा दृढ उभिएको छ’ चौधरीले भनिन् । धर्मलाई आधार बनाएर हिंसाको प्रयोग गर्नु धर्मको विरोध भएको उनले बताइन ।  

समयमै नियन्त्रण नगर्ने हो भने आतंकवाद जताततै फैलिने खतरा रहेको भन्दै चौधरीले भनिन्, ‘भारतीय प्रधानमन्त्री नरेन्द्र मोदीज्यू यस्ता आपराधिक गतिविधि गर्नेलाई छाड्नु हुँदैन । यस्तो आतंकवादलाई कहिले पनि छाड्न हुँदैन । नेपाल सरकार र नेपाली जनता भारतीय जनताको साथमा छ ।’

सांसद चौधरीले नेपाल भारत सीमा क्षेत्रमा विशेष ध्यान पुर्‍याउनु पर्ने बताइन् । ‘दुवै देशको जनता र नागरिकको सुरक्षाका लागि नेपाल–भारत १८ सय ५० किमी खुला सीमामा विशेष ध्यान र सुरक्षा बढाउन जरुरी छ’ नेपाल भारत महिला मैत्री समाजकी अध्यक्ष समेत रहेकी सांसद चौधरीले भनिन् ।